धक्कादायक! आणखी एका बॉलरला इन्ज्युरी, दक्षिण आफ्रिकेविरुद्धच्या मालिकेतून ‘आऊट’

रांची, 8 ऑक्टोबर: आशिया कप स्पर्धेपासून भारतीय संघाला लागलेलं दुखापतींचं ग्रहण अजूनही सुटलेलं नाही. रवींद्र जाडेजा मग जसप्रीत बुमरा असे दोन मोठे धक्के भारतीय संघाला वर्ल्ड कपआधी बसले आहेत. त्यामुळे भारताचं बॉलिंग डिपार्टमेंट वर्ल्ड कपच्या अनुषंगानं तितकंस मजबूत वाटत नाही. आणि याच दरम्यान आणखी एका बातमीनं भारतीय संघाची चिंता वाढवली आहे. भारताचा वेगवान गोलंदाज दीपक चहरला दक्षिण आफ्रिकेविरुद्धच्या पहिल्या वन डे सामन्यात संधी मिळाली नाही. त्यानंतर त्याचा पाय मुरगळला असल्याचं समोर आलं. आणि आता याच करण्यामुळे त्याला उर्वरित मालिकेतूनही माघार घ्यावी लागणार आहे. त्याच्या जागी बीसीसीआयनंही बदली खेळाडूची घोषणा केली आहे.

पहिल्या वन डेआधी चहरला दुखापत

लखनौमध्ये भारत आणि दक्षिण आफ्रिका संघांमध्ये पहिला वन डे सामना पार पडला. या वन डे आधी सराव करताना दीपक चहरचा पाय मुरगळला होता. त्यामुळे त्याला लखनौ वन डेत अंतिम अकरात स्थान मिळालं नाही. त्यानंतर त्याच्या दुखापतीचं कारण समोर आलं. आणि आता तर तीच दुखापत भारतासाठी चिंतेचं कारण ठरली आहे. चहर हा टी20 वर्ल्ड कपसाठीच्या भारतीय संघात स्टँड बाय खेळाडू आहे. इतकच नव्हे तर जखमी बुमराच्या जागी त्याच्या नावाची मोठी चर्चा सध्या सुरु आहे.

हेही वाचा – MS Dhoni: पांढरा टी-शर्ट, काळा मास्क… पाहा धोनीचा नवा अवतार, CSK ने शेअर केले फोटो

वॉशिंग्टन सुंदरची संघात एन्ट्री

बीसीसीआयनं चहरच्या बदली भारतीय संघात अष्टपैलू खेळाडू वॉशिंग्टन सुंदरला संघात स्थान दिलं आहे. विंडीज दौऱ्यादरम्यान वॉशिंग्टन सुंदरला दुखापत झाली होती. त्यामुळे अनेक दिवस तो क्रिकेटपासून दूर होता. पण दुखापतीतून सावरल्यानंतर बीसीसीआयच्या निवड समितीनं त्याला दक्षिण आफ्रिकेविरुद्धच्या दोन वन डेसाठी भारतीय संघात जागा दिली आहे. त्यामुळे रांचीतल्या दुसऱ्या वन डेत सुंदर भारतीय संघात सामील होईल.

🚨 NEWS 🚨: Washington Sundar replaces Deepak Chahar in ODI squad. #TeamIndia | #INDvSA

More Details 🔽https://t.co/uBidugMgK4

— BCCI (@BCCI) October 8, 2022

रविवारी होणार दुसरा सामना

भारत आणि दक्षिण आफ्रिका संघातला दुसरा सामना रविवारी दुपारी खेळवला जाणार आहे. पहिल्या वन डे सामन्यात भारताला अवघ्या 9 धावांनी पराभव स्वीकारावा लागला होता. त्यामुळे टेम्बा बवुमाचा दक्षिण आफ्रिकन संघ मालिकेत सध्या 1-0 अशा आघाडीवर आहे. रांचीतली दुसरी वन डे जिंकून मालिकेत बरोबरी साधण्याचा टीम इंडियाचा प्रयत्न राहिल.