शिवाजी महाराजांची भूमिका साकारणाऱ्या शरद केळकरला मराठी बोलता का यायचं नाही? सुबोध भावेने केली मदत

Sharad Kelkar Har Har Mahadev! मी मराठी आहे का? असा अनेकांना प्रश्न पडतो. तर हो; मी मराठी आहे! माझा जन्म छत्तीसगढचा; शालेय शिक्षण आणि लहानाचा मोठा मी मध्य प्रदेश ग्वाल्हेरमध्ये झालो. त्यामुळे सुरुवातीला माझं मराठी तितकंसं चांगलं नव्हतं. फार मराठी बोलताही येत नव्हतं. नेहमी लोकांची अशी चर्चा असते की, हा मराठी मुलगा आहे; तरी याचं मराठी शुद्ध नाही. माझं शिक्षण हिंदी भाषेत झालंय. पण, मी सातत्यानं मराठी बोलण्याचा, सुधारण्याचा प्रयत्न करायचो. माझ्या आईला मला बड्या मराठी सिनेमात प्रमुख भूमिकेत बघायचं होतं. पण मला मराठी सिनेमात प्रमुख भूमिका मिळणं तेव्हा कठीण होतं. खरं तर यात थोडी माझीही चूक आहे.

सुबोध भावेने मदत केली

मी सुरुवातीला मराठी संवाद जसेच्या तसे पाठ करून बोलायचो. त्यामागील अर्थ, भाव मला फारसा समजायचा नाही. परंतु, यावेळी दिग्दर्शक अभिजित देशपांडेनं माझ्यावर विश्वास ठेवला आणि बाजीप्रभू देशपांडे यांची भूमिका साकारण्याबद्दल विचारलं. अभिजित आणि सुबोध भावे यांनी माझी एखाद्या लहान विद्यार्थ्याप्रमाणे मराठी भाषेची शिकवणी घेतली. शब्दोच्चार, भावार्थ, अमुक एका वाक्यातील लहेजा त्यांनी मला समजावून सांगितला. माझ्यासाठी हा सिनेमा सगळ्यात जास्त महत्त्वाचा आहे. कारण, या सिनेमाच्या निमित्तानं मराठी सिनेमात प्रमुख भूमिकेसाठी माझी दखल घेतली गेली. मी मराठी आहे यावर शिक्कामोर्तब झालं.

शरद हा मराठी मातीतला मुलगा

‘लय भारी’ या सिनेमात मी खलनायकाची भूमिका साकारली होती. या भूमिकेसाठीदेखील प्रेक्षकांकडून प्रेम मिळालं. पण आता ‘हर हर महादेव’ या सिनेमामुळे प्रत्येकाला कळेल की, शरद हा मराठी मातीतला मुलगा आहे. त्याची जन्मभूमी महाराष्ट्र नसली तरी; त्याचं मन महाराष्ट्र आणि मराठी भाषेत अडकलंय. बाजीप्रभूंच्या भूमिकेसाठी विचारणा झाली तेव्हा मला आश्चर्य वाटलं. कारण, त्यावेळी नुकताच ‘तान्हाजी’ सिनेमा प्रदर्शित झाला होता.

बाजीप्रभू देशपांडेंच्या भूमिकेत प्रेक्षक पाहतील का?

मी साकारलेल्या छत्रपती शिवाजी महाराजांच्या भूमिकेला प्रेक्षकांचा चांगला प्रतिसाद मिळाला. त्याच व्यक्तीला आता बाजीप्रभू देशपांडेंच्या भूमिकेत प्रेक्षक बघू शकतील का?, स्वीकारतील का? असे मला प्रश्न पडले होते; पण अभिजित देशपांडे सरांचा विविध गोष्टींकडे बघण्याचा दृष्टिकोन कल्पक असतो हे मला जाणवलं. माझ्यात त्यांना बाजीप्रभू दिसत होते. माझ्यासाठीही एक अभिनेता म्हणून हे आव्हानात्मक होतं. जोपर्यंत हा सिनेमा संपूर्ण चित्रित होत नाही; तोपर्यंत दुसरा कोणताही प्रोजेक्ट हातात घ्यायचा नाही असं मी ठरवलं होतं.

मी खूप हळवा आहे

माझ्या आवाजामुळे, शरीरयष्टीमुळे सगळ्यांनाच असं वाटत की, मी कणखर माणूस आहे. खरं सांगायचं तर मी खूप हळवा आहे. मी पटकन भावूक होतो. सिनेमाच्या संगीत लोकार्पण सोहळ्यातही माझ्या डोळ्यांत पाणी आलं होतं. काही जणांना माहिती असेल; मी बोलताना ‘स्टॅमर’ करायचो. पण तुम्ही स्वतःवर विश्वास ठेवला तर तुम्ही कोणत्याही गोष्टीवर मात करू शकता. ‘बाहुबली’ सिनेमाच्या हिंदी आवृत्तीसाठी मी प्रभासला आवाज दिला होता.

​माझ्या मराठी असण्यावर शिक्कामोर्तब​

आता पुन्हा एकदा ओम राऊत दिग्दर्शित ‘आदिपुरुष’ सिनेमाच्या हिंदी आवृत्तीसाठी प्रभासला मी आवाज देतोय. त्यामुळे एकीकडे बाजीप्रभूंची भूमिका आणि दुसरीकडे ‘आदिपुरुष’ सिनेमात श्रीराम या भूमिकेला माझा आवाज. हा योग सुखावणारा आहे. कलाकार म्हणून मला विविधांगी काम करायला मिळतंय याचं समाधान आहे. मराठी सिनेमांत मला आता मध्यवर्ती भूमिका मिळत असून माझ्या मराठी असण्यावर शिक्कामोर्तब होणं हे माझ्यासाठी सीमोल्लंघन आहे.