निरोप घेतो आता आम्हा आज्ञा असावी… बाप्पाच्या चरणी मराठमोळ्या कलाकारांचं साकडं

Marathi Celebrities Bid Adieu To Lord Ganesh:’तू सुखकर्ता, तू दु:खहर्ता’ म्हणत गणेश चतुर्थीदिवशी अवघ्या महाराष्ट्राने बाप्पांचं स्वागत केलं. गेले १० दिवस बाप्पांची मनोभावे सेवाही केली आणि आज त्यांना निरोप देण्याची वेळ आली आहे. आज राज्यभरात जड अंत:करणाने गणरायाला निरोप दिला जाईल. मराठी मनोरंजन इंडस्ट्रीतील सेलिब्रिटींच्या घरीही बाप्पा दिमाखात विराजमान होतो. काही जणांच्या घरी जरी बाप्पाचे आगमन होत नसले, तरी गणेशोत्सवाच्या अनेक आठवणी प्रत्येकाकडे असतातच! सोसल मीडियावर या सेलिब्रिटींनी घरच्या बाप्पाचे फोटोही शेअर केलेत. लाडक्या गणरायाची सेवा करताना या सेलिब्रिटींनी त्याच्याकडे खास मागणंही मागितलं आहे. कुणी सकारात्मकता मागितली आहे, तर देशाच्या समृद्धीसाठी प्रार्थना करत आहे. वाचा गणेशाच्या चरणी या सेलिब्रिटींनी काय साकडं घातलं आहे.

निरोप घेतो देवा आज्ञा असावी…

‘बाप्पा चालले आपुल्या गावाला…’ म्हणत आज गणरायाला निरोप दिला जातो आहे. १० दिवस मोठ्या उत्साहाने हा गणेशोत्सव साजरा करणारे भाविक आज जड अंत:करणाने बाप्पाला निरोप देतील. दरवर्षी गणेशोत्सवात बाप्पा सकारात्मकता घेऊन येतात. बाप्पाकडे मागितलेल्या गोष्टी पूर्ण होतात, अशी आशाही प्रत्येक भाविकाला असते. या लाडक्या गणेशाकडे तुम्हीही काहीतरी मागितलं असेलंच, जाणून घ्या आजच्या दिवशी मराठी सेलिब्रिटींनी बाप्पाकडे काय साकडं घातलं आहे.

​सकारात्मकता यावी

अभिनेत्री सायली संजीव म्हणते की, ‘करोना काळात आपण सगळेच हतबल झालो होतो. तो काळ सगळ्यांसाठीच कठीण होता. पण आम्ही दोन वर्षं सतत जी प्रार्थना करत होतो ती तू ऐकलीस आणि आता हळूहळू सगळं पूर्ववत होतंय; त्यासाठी बाप्पा तुझे मनापासून आभार. आता यापुढे कुठलंही संकट नको हीच मनापासून प्रार्थना करते. सगळे निरोगी आणि सुदृढ रहावेत. करोनाकाळ वाईट असला तरी त्या काळानं आपल्याला एकत्र राहायला शिकवलंय. तसंच यापुढेही सगळे एकत्र रहावेत, एकमेकांच्या बरोबरीनं पुढे जावं आणि सगळ्यांमध्ये सकारात्मकता य़ावी हीच सदिच्छा आहे.’

​माझ्यातला बाप्पा शोधता यावा

अभिनेत्री स्वानंदी टिकेकर म्हणते की, ‘बाप्पा, तू ज्या-ज्या गोष्टींचं प्रतीक आहेस; ते सगळं मला माझ्यात बघता येऊ दे. तू कलाधिपती आहेस, विद्येची देवता आहेस, विघ्नहर्ता आहेस, प्रगल्भ विचार आणि शक्तीचं प्रतीक आहेस, प्रत्येक गोष्टीचा आनंद घेणारा आहेस, देणारा आहेस. हे सगळे गुण मला माझ्यात सापडू दे आणि ते आत्मसात करण्याची शक्ती दे. तुझ्याकडे बघताना मला माझ्यातला बाप्पा शोधता यावा; म्हणजे बप्पावर मी जसं प्रेम करते तसं स्वत:वर आणि माझ्या आजुबाजूच्या माणासांवर करू शकेन.’

​कृतज्ञ भावना रुजू दे

अभिनेता शंतनु मोघे याने असं साकडं घातलं आहे की, ‘गणराया, तू सुखकर्ता आहेस. नेहमी आमच्या पाठीशी असतोस. जे जे उत्तम आहे ते तू आम्हाला देतोस; पण जाता जाता तुला एवढंच सांगेन की, माणसाला माणसासारखं वागण्याची बुद्धी दे, सारासार विचार करण्याची आणि प्रत्येक गोष्टीकडे, माणसाकडे डोळसपणे बघण्याची नजर दे. स्वप्नं बघण्याची आणि त्याकरता न खचता मेहनत करण्याची शक्ती दे. प्रत्येक गोष्टीची जाण ठेऊन त्याबाबत कृतज्ञ राहण्याची भावना सगळ्यांमध्ये रुजू दे. आमच्यात सकारात्मकता निर्माण होऊ दे आणि ती आम्हाला इतरांमध्येही पसरवता येऊ दे. तुझ्याविषयी मनात श्रद्धा आहे तशीच श्रद्धा आजुबाजूची माणसं आणि माणुसकीविषयी बाळगळ्याचं बळ दे.’

​आमच्यात सद्भावना असावी

अभिनेत्री अनिता दाते म्हणते की, ‘बाप्पा, तुझ्या उत्सवासाठी आम्ही नेहमीच उत्सुक असतो. गणेशोत्सव साजरा करणं हे तितकंच जबाबदारीचंदेखील काम आहे. यावर्षी सगळ्यांनीच तुझं मोठ्या उत्साहात स्वागत केलं. पण ती भव्यता दिखाव्यासाठी आहे की काय असं वाटतं. अजूनही आम्ही पुरते स्थिरस्थावर झालेलो नाही. करोनाकाळात अनेकांच्या नोकऱ्या गेल्या, नुकसान झालं, अजूनही बऱ्याच ठिकाणी दुष्काळ पडलेले आहेत. पण आता सगळं काही स्थिरस्थावर व्हावं, माणसांमध्येसुद्धा समजूतदारपणा असावा, शांतता असावी आणि खऱ्या अर्थानं लोकांनी आनंदानं उत्सव साजरा करावा. आम्हाला चांगला विचार करण्याची बुद्धी दे! आमच्यात सद्भावना असावी, आमच्या हातून चांगल्या गोष्टी व्हाव्यात असा आशीर्वाद पाठीशी असू दे.’

​देशाला समृद्धी लाभू दे

अभिनेता हरीश दुधाडे म्हणतो की, ‘ देशाला, महाराष्ट्राला समृद्धी लाभू दे. माझा देश आहे तर माझं कुटुंब आहे आणि कुटुंब आहे तरच मी आहे. त्यामुळे बाप्पा, सगळे निरोगी, आनंदी राहू दे. सगळ्यांची उत्तरोत्तर प्रगती होऊ दे, भरभराट होऊ दे अशी मनापासून प्रार्थना. मला मराठी मनोरंजनविश्वाविषयी मनापासून काहीतरी सांगायचंय. या क्षेत्रातले नट, कलाकार, लेखक, दिग्दर्शक, तंत्रज्ञ सगळे प्रचंड मेहेनत घेत उत्तम दर्जाचा आशय तयार करण्याचा प्रयत्न करत आहेत. आमच्या सगळ्यांच्या मेहनतीला यश मिळू दे आणि मराठी सिनेसृष्टीचं जगभरात नाव होऊ दे.’