मुंबई महापालिका शाळांमधील १३० शिक्षक बडतर्फ! ‘हे’ आहे कारण

मुंबई : मुंबई महापालिका शाळांमध्ये (BMC) सेवेत असलेल्या १३० शिक्षकांना शिक्षक पात्रता परीक्षा (TET) पूर्ण केली नाही म्हणून बडतर्फ करण्यात आले आहे. या शिक्षकांना मार्च २०१९ ही अखेरची मुदत देण्यात आली होती.

मुंबई महापालिकेच्या शिक्षण विभागाने उन्हाळी सुटी सुरू झाल्यानंतर १ मे रोजी या शिक्षकांना बडतर्फीचे आदेश दिले आहेत. यामुळे हे शिक्षक दाद मागण्यासाठी न्यायालयात जाणार आहेत. केंद्र सरकारच्या मार्गदर्शक सुचनांनुसार २०१३नंतर झालेल्या शिक्षक नियुक्तीमध्ये नियुक्तीवेळी ‘शिक्षक पात्रता परीक्षा’ उत्तीर्ण नसणाऱ्यांना मार्च २०१९ ही अंतिम मुदत देण्यात आली होती. मात्र, त्यांनी या कालावधीत ही परीक्षा उत्तीर्ण न केल्याने अखेर त्यांच्यावर ही कारवाई करण्यात आली. याबाबत त्यांना वारंवार सूचना देण्यात आल्याचेही पालिका शिक्षण अधिकारी राजे कंकाळ यांनी सांगितले.

केंद्राने २०१०मध्ये शिक्षक पात्रता परीक्षा लागू केली. राज्यात त्याची अंमलबजावणी २०१३ पासून करण्यात आली. केंद्राच्या मार्गदर्शक सूचनांनुसार मार्च २०१९ची अंतिम मूदत देण्यात आली होती. मात्रज्या राज्यांमध्ये २०१०पासून शिक्षक पात्रता परीक्षा सक्तीची करण्यात आली तेथे त्यांना नऊ वर्षांचा कालावधी मिळाला तर आपल्या राज्यातील या शिक्षकांना नियुक्तीनंतर परीक्षा देण्यासाठी सहा वर्षांचाच कालावधी मिळाला आहे यामुळे याबाबत उच्च न्यायालयात दाद मागण्यात येणार असल्याची भूमिका शिक्षकांनी घेतली आहे. या १३० जणांमध्ये काही शिक्षकांनी पात्रता परीक्षा उत्तीर्ण केली आहे. मात्र ते मार्च २०१९च्या आत त्याची पूर्तता कूरू शकले नाहीत म्हणून ही कारवाई करण्यात आली आहे. अशाप्रकारे जर कारवाई करायची असेल तर राज्यातील विविध भागात असे अनेक शिक्षक असतील तसे झाल्यास नवीन शैक्षणिक वर्ष सुरू होताना शिक्षक बडतर्फीचे नवे आव्हान उभे ठाकेल अशी प्रतिक्रिया शिक्षण तज्ज्ञ देत आहेत.

Teacher Job: ज्युनिअर कॉलेजांमधील शिक्षक भरतीचा मार्ग मोकळा
दोन दिवसात सरल पोर्टल वर माहिती भरा; शिक्षण विभागाचा शाळांना फतवा
राज्यात किती शाळांमध्ये पहिली ते आठवीच्या परीक्षा झाल्या? शासन घेतेय माहिती