MPSC Job: राज्य सरकारच्या पाणीपुरवठा व स्वच्छता विभागात भरती, जाणून घ्या तपशील

सरकारच्या विविध विभागांतील रिक्त जागांमुळे कामकाज प्रभावित होत असल्याची तक्रार केली जात असताना भरतीप्रक्रियेअभावी बेरोजगारीचा प्रश्न गंभीर बनल्याची खदखद व्यक्त केली जाते. या पार्श्वभूमीवर राज्य सरकारच्या पाणीपुरवठा व स्वच्छता विभागातील भूजल सर्वेक्षण आणि विकास यंत्रणेतील रिक्त पदांवर भरतीसाठी जाहिरात प्रसिद्ध झाली आहे. त्यामुळे उच्चशिक्षित तरुणांना त्यांच्या शैक्षणिक अर्हतेनुसार रोजगाराची संधी उपलब्ध होणार आहे.

या भरतीमुळे विभागाचे प्रभावित झालेले कामकाज पुन्हा गतिमान होण्यासही मदत होणार आहे. ‘एमपीएससी’तर्फे वेगवेगळ्या पाच जाहिराती प्रसिद्ध करताना त्या-त्या पदाच्या अर्हतेनुसार ऑनलाइन अर्ज मागविले आहेत. सर्व जागांकरिता अर्ज करण्याची मुदत १० जानेवारी निश्चित केलेली आहे.

ऑफलाइन पद्धतीने बँकेत चलनाद्वारे शुल्क भरण्यासाठी १३ जानेवारीपर्यंत मुदत असेल. कनिष्ठ वैज्ञानिकापासून सहसंचालकपदाच्या संवर्गांचा समावेश भरतीसाठी केलेला आहे. प्रत्येक पदाकरिता अर्हता निश्चित असून, त्याचा तपशील ‘एमपीएससी’ने जाहीर केलेला आहे.

पद व उपलब्ध जागांची संख्या

-कनिष्ठ भूवैज्ञानिक, गट ब संवर्गातील ८३ जागा

-सहायक भूवैज्ञानिक, गट ब संवर्गातील २२ जागा

-वरिष्ठ भूवैज्ञानिक, गट अ संवर्गातील १२ जागा

-उपअभियंता (यांत्रिकी), गट अ संवर्गातील २६ जागा

-सहसंचालक, गट अ संवर्गातील १ जागा

KVS Job 2022: केंद्रीय विद्यालयात बंपर भरती, मिळेल चांगल्या पगाराची नोकरी

विभागीय क्षेत्ररक्षक पदांसाठी भरती

नाशिक : नागरी संरक्षण कार्यालयाच्या अधिपत्याखालील अंबड, सातपूर, पंचवटी, नाशिकरोड, भद्रकाली, सरकारवाडा, देवळाली कॅम्प, ओझर या आठ नागरी संरक्षण विभागात विभागीय क्षेत्ररक्षक हे मानसेवी पद भरण्यात येणार आहे.

इच्छुक स्वयंसेवक व स्वयंसेविकांनी टपालाद्वारे किंवा व्यक्तिश: बंद पाकिटात जिल्हाधिकारी कार्यालय येथील उपनियंत्रक नागरी संरक्षण कार्यालयात अर्ज करावेत, असे आवाहन नागरी संरक्षण कार्यालयाच्या उपनियंत्रकांनी केले आहे. ३० डिसेंबरला सायंकाळी पाचपर्यंत अर्ज करता येणार आहे. हे पद मानसेवी असल्याने या पदास सरकारकडून कोणत्याही प्रकारचे वेतन, प्रोत्साहन भत्ता, मानधन इत्यादी सवलती देण्यात येणार नाही. अधिक माहितीसाठी सहाय्यक उपनियंत्रक, नागरी संरक्षण कार्यालयाशी ०२५३- २५७३१४९ या दूरध्वनी क्रमांकावर संपर्क साधावा, असे आवाहन करण्यात आले आहे.

पोलीस आयुक्तालयातील एक हजार पदांसाठी ७४ हजार उमेदवार इच्छुक