MajhiNews Marathi News, Latest Marathi News, Marathi News Paper, Maharashtra Breaking News | मराठी ताज्या बातम्या
राज्यातील ‘क’ गटाची सर्व पदे महाराष्ट्र लोकसेवा आयोगातर्फे (एमपीएससी) भरण्याचा निर्णय घेण्यात आल्यानंतर आता या पदभरतीच्या प्रत्यक्ष प्रक्रियेला सुरुवात झाली आहे. महसूल विभागातील गट ‘क’ पदांच्या भरतीसाठी ‘एमपीएससी’ला परवानगी देण्यात आली असून, जानेवारी महिन्यात एमपीएससी प्रथमच गट ‘क’च्या पदांसाठी जाहिरात काढणार आहे. राज्य सरकारने घेतलेल्या या निर्णयाची अंमलबजावणी होत असल्याने ‘एमपीएससी’च्या विद्यार्थ्यांनी या निर्णयाबाबत समाधान व्यक्त केले आहे.
नोव्हेंबरमध्ये राज्य सरकारकडून सर्व विभागांतील गट ‘क’ पदांसाठीच्या परीक्षा ‘एमपीएससी’कडून घेण्यात येतील, असा निर्णय घेतला. यापूर्वी या परीक्षा त्या-त्या विभागांकडून नेमण्यात आलेल्या खासगी कंपन्यांकडून घेतल्या जात होत्या. गेल्या काही वर्षांमध्ये या परीक्षांमध्ये पेपरफुटीसह अनेक गैरप्रकार आढळून येत होते. यामुळे आता गट ‘क’च्या सर्व परीक्षा ‘एमपीएससी’कडून घेण्याचा निर्णय घेण्यात आला. त्यानुसार महसूल विभागाने लिपिक-टंकलेखक (महसूल सहायक) या पदांसाठी परीक्षा घेण्यास ‘एमपीएससी’ला मान्यता दिली आहे. ‘एमपीएससी’कडून जानेवारी महिन्यात या पदांच्या परीक्षेसाठी जाहिरात प्रसिद्ध केली जाणार आहे.
मराठा उमेदवारांचा पुन्हा भ्रमनिरास, आर्थिक दुर्बल कोट्यातून नियुक्तीपत्र देण्यास स्थगिती
यापूर्वी ‘एमपीएससी’कडून केवळ गट ‘अ’ आणि ‘ब’च्या परीक्षा घेतल्या जात होत्या. गट ‘क’च्या परीक्षा सरळसेवेमार्फत त्या-त्या विभागाकडून घेतल्या जात होत्या. यापुढे ही प्रचलित पद्धत बंद होणार असून, आता गट ‘क’च्या परीक्षाही ‘एमपीएससी’द्वारे पार पडणार आहेत. यातून भ्रष्टाचार मोठ्या प्रमाणावर कमी होऊन विद्यार्थ्यांना त्यांच्या गुणवत्तेच्या आधारे नोकऱ्या मिळतील, असा विश्वास व्यक्त करून विद्यार्थ्यांनी या निर्णयाचे स्वागत केले आहे.
महसूल विभागातील लिपिक टंकलेखक (गट क) संवर्गातील पदे ‘एमपीएससी’मार्फत भरण्यास परवानगी दिल्याबद्दल महसूल विभागाचे आणि सरकारचेही आभार. सरकारच्या या निर्णयाचे स्वागतच आहे. ‘एमपीएससी’मार्फत परीक्षा होणार असल्याने यापुढे होणाऱ्या परीक्षा पारदर्शक होतील. ‘एमपीएससी’ने जाहिरात लवकरात लवकर प्रसिद्ध करून परीक्षा प्रक्रियेला सुरुवात करावी.
– महेश घरबुडे, स्पर्धा परीक्षा समन्वय समिती
