कर्नाटकात न्यायमूर्तींनी व्यासपीठावरून हटवला डॉ. बाबासाहेब आंबेडकरांचा फोटो; मुख्यमंत्र्यांनी दिले कारवाईचे आदेश

कर्नाटकचे मुख्यमंत्री बसवराज बोम्मई यांनी रविवारी मुख्य जिल्हा आणि सत्र न्यायाधीश न्यायमूर्ती मल्लिकार्जुन गौडा यांच्यावर कारवाई करण्याचे आश्वासन दिले, ज्यांनी गेल्या महिन्यात रायचूर येथे प्रजासत्ताक दिनाच्या समारंभात व्यासपीठावरून डॉ बाबासाहेब आंबेडकर यांचा फोटो काढून टाकला होता.शनिवारी बेंगळुरूमधील फ्रीडम पार्कमध्ये जमलेल्या हजारो आंदोलकांच्या बैठकीनंतर बोम्मई यांनी ही घोषणा केली.

या वरून झालेल्या मोठ्या गदारोळाबद्दल दलित संघर्ष समिती (DSS) च्या नेत्यांनी आणि इतर कार्यकर्त्यांनी गौडा यांच्या निलंबनाची मागणी केली. शहर रेल्वेसमोर जमलेल्या हजारो आंदोलकांनी संविधान संरक्षण महा ओक्कुटा (एसएसएमओ) च्या नेतृत्वाखाली ‘विधान सौधा चलो’ आणि ‘उच्च न्यायालय चलो’च्या घोषणा देत मोर्चा काढला. या मोर्चात त्यांनी हातात निळे झेंडेही घेतले होते.

आंदोलकांशी संवाद साधताना मुख्यमंत्री बोम्मई म्हणाले की, हा मुद्दा त्यांच्या निदर्शनास आणून दिला आहे. “या कृत्याविरुद्ध कारवाई केली जाईल. डॉ. बाबासाहेब आंबेडकर यांचे छायाचित्र काढून टाकल्याच्या घटनेबाबत दलित समाजाच्या नेत्यांनी मला सविस्तर समजावून सांगितले आहे. याबाबत मी संबंधित लोकांशी चर्चा करून लवकरच पत्र लिहिणार आहे, असे ते म्हणाले.

“डॉ. आंबेडकरांचा झालेला अपमान निंदनीय आहे. आपल्या राज्यघटनेच्या निर्मात्याचा अपमान करणारे कोणतेही कृत्य कोणत्याही परिस्थितीत खपवून घेतले जाऊ नये. डॉ.आंबेडकरांची प्रतिष्ठा आणि सन्मान राखण्यात आम्ही आघाडीवर आहोत. आम्ही संविधानानुसार न्याय देऊ,” बोम्मई पुढे म्हणाले.आंदोलनादरम्यान, बहुजन समाज पक्षाचे (बीएसपी) प्रदेशाध्यक्ष एम कृष्णमूर्ती म्हणाले, “आंबेडकरांच्या नावाने निवडणुका जिंकणारे अनेकजण मनुवादाचे (मनुस्मृतीचे) गुलाम बनत आहेत, हे निंदनीय आहे. यापूर्वीही अनेक घटना घडल्या आहेत, ज्यात डॉ.बी.आर.आंबेडकर यांचा उघडपणे अपमान करण्यात आला आहे. न्यायमूर्ती मल्लिकार्जुन गौडा यांच्यावर कारवाई न केल्यास तीव्र आंदोलन करण्यात येईल.शुक्रवारी, गौडा यांची कर्नाटक राज्य परिवहन अपीलीय न्यायाधिकरण, बेंगळुरूचे पीठासीन अधिकारी म्हणून बदली करण्यात आली.

The post कर्नाटकात न्यायमूर्तींनी व्यासपीठावरून हटवला डॉ. बाबासाहेब आंबेडकरांचा फोटो; मुख्यमंत्र्यांनी दिले कारवाईचे आदेश appeared first on Loksatta.

Source link