हा काय हिरो आहे का, अशी टीका लोक करतात; तेही अगदी समोर…प्रथमेश परब स्पष्टच बोलला

‘आजची तरुणाई जी भाषा बोलते, जशी व्यक्त होते, त्यांचं जे भावविश्व आहे, कट्ट्यांवरची भाषा आहे, ती सिनेमात आली तर कुठे बिघडलं,’ हे म्हणणं आहे, अभिनेता प्रथमेश परबचं. तरुणाईचं आयुष्य मांडणारे सिनेमे तेही त्यांच्याच भाषेत बिनधास्त येत राहावेत, असंही तो म्हणतो.

तिसऱ्यांदा दगडू साकारला तेव्हा…
टाइमपास आणि दगडू हे समीकरण झालं. त्याबद्दल प्रथमेश म्हणतो, ‘मला अपेक्षा नव्हती तितकं प्रेम या भूमिकेवर लोकांनी केलं. ‘टीपी १’ पाहूनच ‘टीपी ३’साठी तयारी केली, असं मी म्हणतो. यातली दगडू-प्राजू ही केमिस्ट्री प्रेक्षकांना आवडली. या सिनेमाचं संगीतही गाजलं. माझ्यासाठी ही भूमिका म्हणजे होमपिचवर बॅटिंग करण्यासारखं होतं. अनेक जण दगडूशी रिलेट करतात हे महत्त्वाचं. ’

आवडतील त्याच भूमिका
एखादी कलाकृती गाजली की, त्याच त्या प्रकारच्या भूमिकांसाठी विचारणा होते. त्याविषयी प्रथमेश म्हणतो, ‘मला जे मनापासून आवडतं ते मी करतो. ‘टाइमपास’ असो, ‘टकाटक’ वा ‘डार्लिंग’, हे सिनेमे आवडले म्हणूनच केले. व्यावसायिक भाग म्हणूनही कलाकाराला कार्यरत राहणं आवश्यक असतं. काही विशिष्ट सिनेमे गाजल्यावर त्याच पॅटर्नच्या सिनेमांसाठी मलाही विचारणा झाली होती, मात्र मी जाणीवपूर्वक ते केले नाहीत. मी अभिनेता म्हणून किती चांगला आहे हे दाखवण्यासाठी धडपडण्यापेक्षा चांगल्या भूमिका निवडून त्यातून बोलणं मला अधिक आवडेल.’
महाराष्ट्राच्या इच्छा होत्या त्या सगळ्या पूर्ण झाल्या… ‘देवमाणूस’ किरण गायकवाडची पोस्ट चर्चेत

टीका आणि ट्रोलिंग
तरुणांसाठीच्या सिनेमांवर द्वयर्थी संवाद वा शिव्या यासाठी टीका होते. नव्या पिढीचा दृष्टिकोन काय आहे हे न पाहता टीका करणं प्रथमेशला योग्य वाटत नाही. तो म्हणाला, ‘टकाटक’सारखा विषय हा सेक्स एज्युकेशनवर होता. ‘एक नंबर’ आणि ‘डार्लिंग’ या कलाकृतीही युथफुल होत्या. त्यांचे विषय त्यांच्याच भाषेत सांगितले नाहीत, तर त्यांना ते पटतील का? सिनेमाला कोण येईल आणि कोण नाही, याचा विचार करण्यात अडकण्यापेक्षा तुम्हाला कलाकार म्हणून ते आवडणं महत्त्वाचं. तरुणांची भाषा, कट्टे, सोशल मीडिया ग्रुप हे सगळं मी स्वतः कॉलेजमध्ये जात असल्यानं पाहतो. मग हेच सगळं पडद्यावर आलं, तर काय बिघडलं? असे विषय मोकळेपणानं मांडले पाहिजेत आणि त्यावर बोललंही पाहिजे. सिनेमा हे मनोरंजनासह प्रबोधानचंही माध्यम आहेच. टीका झाली, तर वाईट वाटतंच. हा काय हिरो आहे का, वगैरे वैयक्तिक टीकाही लोक करतात; तेही अगदी समोर, मला आता त्याची सवय झाली आहे. ट्रोलिंगचा जमाना आहे, लोकांनी ते खुशाल करावं, आपण आपलं काम करत राहायचं.’

प्रवास… आणि पुढं
एकांकिकांपासून सिनेमापर्यंत झालेल्या प्रवासाबद्दल प्रथमेश म्हणतो, ‘अभिनेता म्हणून सर्वांनाच मी आवडेन, असं नाही. प्रत्येक वेळी आपण आणि आपलं काम कुणाला आवडावं, असा आग्रह आपण धरू शकत नाही. अभिनेता म्हणून वैविध्यपूर्ण काम करत राहीन. आगामी काळात ‘ढिशकॅव’, ‘होय महाराजा’ असे लागोपाठ सिनेमे येतील.’