Exclusive Interview: बॅडमिंटनमध्ये महाराष्ट्र कधी अव्वल होईल; सिंधूने एका वाक्यात दिले उत्तर

अहमदाबाद : दक्षिण भारतातून मोठ्या प्रमाणावर अव्वल बॅडमिंटनपटू येत आहेत. यात तथ्य असले, तरी महाराष्ट्रासह इतर राज्यातही गुणवान खेळाडू आहेत. मात्र, योग्य मार्गदर्शन, योग्य खेळाडू, खेळाडूंना चांगल्या सुविधा, चांगले प्रशिक्षक मिळाले आणि बॅडमिंटनमधील प्रगतीसाठी योग्य साथ लाभली, तर महाराष्ट्रातूनही चांगले बॅडमिंटनपटू पुढे येतील, अशी प्रतिक्रिया ऑलिम्पियन पदक विजेती बॅडमिंटनपटू पी. व्ही. सिंधू (P V Sindhu)ने व्यक्त केली.

महाराष्ट्राने देशाला अनेक राष्ट्रीय बॅडमिंटन विजेते दिले. मात्र, सध्या राष्ट्रीय संघात दक्षिणेकडील खेळाडूंच प्रामुख्याने आहेत. “महाराष्ट्रातही चांगले बॅडमिंटनपटू आहेत. त्यांच्यात गुणवत्ता आहे. महाराष्ट्राची मालविका चांगली खेळत आहे. तिला राष्ट्रीय विजेती होण्याची संधी होती. महाराष्ट्राच नव्हे, तर अनेक राज्यात गुणवान खेळाडू असल्याचे आपण राष्ट्रीय क्रीडा स्पर्धेच्या निमित्ताने बघितलेच. राष्ट्रीय शिबिर हैदराबादमध्ये होते, हे खरे आहे. मात्र, एका रात्रीतून सर्वोत्तम बॅडमिंटनपटू घडत नाहीत. त्यामागे अनेक वर्षांची मेहनत असते. सर्वोत्तम सुविधा खेळाडूंना लाभण्याची गरज असते. सर्वच राज्यांनी तळागाळापर्यंत याचा प्रसार केला, तर देशाला भविष्यात आणखी चांगले बॅडमिंटनपटू मिळतील,” असे सिंधूने सांगितले.

वाचा- WWE स्टार सारा लीचे निधन; वयाच्या ३०व्या वर्षी घेतला जगाचा निरोप, मृत्यूचे कारण…

सिंधूने दुखापतीमुळे राष्ट्रीय स्पर्धेतून माघार घेतली. मात्र, ती उदघाटन सोहळ्यास उपस्थित होती. “मी चार दिवस गुजरातमध्ये होते. अहमदाबाद आणि सुरतमधील स्पर्धांचा आनंद घेतला. राष्ट्रीय स्पर्धा ही युवा खेळाडूंसाठी एक चांगले व्यासपीठ असते. सध्याचे राष्ट्रीय क्रीडा स्पर्धेतील वातावरण भारावून टाकणारे आहे. येथील कामगिरी खेळाडूंसाठी प्रेरणादायी ठरत असते. गुणवान खेळाडू पुढे येत आहेत. मात्र, जागतिक स्तरावरील खेळाडूंना पराभूत करण्यासाठी आणखी मेहनत घ्यावी लागणार आहे,” असा सल्ला सिंधूने पदक विजेत्यांना दिला.

वाचा- फुटबॉल स्टार लिओनेल मेस्सीने केली निवृत्तीची घोषणा; या स्पर्धेत खेळणार अखेरची मॅच

दुखापतीतून सावरत आहे

सिंधूला बर्मिंगहॅम राष्ट्रकुल क्रीडा स्पर्धेदरम्यान घोट्याची दुखापत झाली होती. त्यामुळे तिने राष्ट्रीय स्पर्धेतून माघार घेतली. “सध्या मी सामने खेळण्याइतकी तंदुरुस्त नाही. एमआरआय चाचणी झाली आहे. बर्मिंगहॅममध्ये उपांत्यपूर्व फेरीतच दुखापत झाली होती, त्यावेळी ही दुखापत फारशी गंभीर नसेल, असे मला वाटले होते. प्रशिक्षक, फिजिओ आणि ट्रेनरच्या मदतीने मी त्या दुखापतीसह खेळले.

राष्ट्रकुलमध्ये मला सुवर्णपदक नव्हते. त्यामुळेच मला त्याच्यासाठी अखेरपर्यंत प्रयत्न करायचे होते. यानंतर दुखापतीबाबत कळले. म्हणूनच जागतिक स्पर्धेतूनही माघार घेतली. यातून सावरत असून, लवकरच सरावाला सुरुवात करणार आहे. मात्र, आणखी काही पुढील स्पर्धांत सहभागी होऊ शकणार नाही,” असे सिंधूने सांगितले.

वाचा- यांच्या एका स्माईलवर क्लीन बोल्ड होतात चाहते, यातल्या कितीजणी तुम्हाला माहीत आहेत?

हार-जीत खेळाचा भाग

मागील काही काळात सिंधूला जपान, चीन, कोरियाच्या खेळाडूंकडून पराभव पत्करावा लागला होता. “विजय-पराभव हा खेळाचा भागच असतो. या खेळाडूंनी मला हरविले आहे, तर अनेक वेळा मीदेखील या खेळाडूंना नमविले आहे. त्या विजय किंवा पराभवावरच थांबून राहता, पुढे जायला शिकायला हवे. यातून काय चुकले, त्या चुका सुधरविण्याचा प्रयत्न करायला हवा,” असे सिंधूने सांगितले.

सिंधू म्हणाली…

– गुजरातने राष्ट्रीय स्पर्धेची अतिशय उत्तम तयारी केली आहे. मी चार दिवस अनेक ठिकाणी भेट दिली. तेथील सुविधा सर्वोत्तम

– स्पर्धा भिन्न शहरात होत आहेत, हे चांगलेच. यामुळे खेळाच्या प्रसारास मदत.

– जागतिक स्पर्धा मी टीव्हीवरूनच बघितली. त्या स्पर्धेत खेळत नसल्याची उणीव जाणवली.

– जपानची अकाने यामागुची चांगल्या लयीत आहे. तिने सलग दोन वेळा जागतिक स्पर्धा जिंकली आहे. प्रत्येक खेळाडूचा एक काळ असतो.

– मात्र, यामागुची विरुद्ध माझी कामगिरी चांगली राहिले आहे.

– कोरियाच्या आन से यंगकडून मला सलग पाच वेळा पराभव पत्करावा लागला आहे. भविष्यात मी तिला नमवूच शकणार नाही, असे काही नाही.