एका कॉलवरुन सुरू झाली रेणुका शहाणे- आशुतोष राणांची लव्हस्टोरी, चार वर्षाहून लहान आहे नवरा

मुंबई : बॉलिवूडमध्ये आपल्या सहजसुंदर अभिनयानं आणि सात्विक अशा सौंदर्यानं ज्या अभिनेत्रींनी स्वतःचं असं वेगळं स्थान निर्माण केलं आहे, त्यामध्ये रेणुका शहाणे (Renuka Shahane) यांचा आवर्जून समावेश केला जातो. रेणुका यांच्या सुमधुरहास्य, साधेपणा आणि सहसुंदर अभिनय यांमुळे त्यांनी प्रेक्षकांच्या मनात घर केलं आहे. अशा या गुणी अभिनेत्रीचा आज ५६ वा वाढदिवस आहे.

रेणुका यांनी त्यांच्या करिअरला सुरुवात केली ती दूरदर्शनवरील ‘सुरभी’ कार्यक्रमामुळे. सिद्धार्थ काक यांच्याबरोबरची त्यांची जोडी खूप लोकप्रिय झाली. या दोघांचं ओघवतं निवेदन, बोलण्याचा लहेजा आणि साधेपणा यांमुळे हा कार्यक्रम आणि ते दोघंजण खूप लोकप्रिय झाले. सुरभी कार्यक्रमानंतर रेणुका यांनी सर्कस, सैलाब यांसारख्या अजरामर मालिकांमध्ये काम केलं. त्याशिवाय त्यांनी अंतारक्षरी सारख्या कार्यक्रमाचं निवेदनही केलं होतं.

रेणुका यांनी मालिकांबरोबर अनेक सिनेमांतही काम केलं. त्यांचा सर्वाधिक लोकप्रिय ठरलेला सिनेमा म्हणजे ‘हम आपके हैं कौन’ (Hum Aapke Hain Kaun). या सिनेमामुळे रेणुका या लोकप्रियतेच्या शिखरावर आरुढ झाल्या होत्या. या सिनेमात त्यांच्याबरोबर माधुरी दीक्षित (Madhuri Dixit), सलमान खान (Salman Khan) हे कलाकार होते. परंतु रेणुका यांनी साकारलेली ‘भाभी’ ही व्यक्तीरेखा आजही प्रत्येकाच्या मनात आहे. रेणुका शहाणे यांच्या व्यक्तीगत आयुष्याबद्दल सांगायचं तर त्यांनी अभिनेता आशुतोष राणा (Ashutosh Rana) यांच्याशी लग्न केलं. या दोघांचा प्रेमविवाह. त्यांची लव्हस्टोरी देखील एकदम फिल्मी होती.

रेणुका यांनी हिंदीबरोबरच अनेक मराठी सिनेमांतही काम करत लोकप्रियता मिळवली. हम आपके है कौन सिनेमा रेणुका यांचा खूप आवडता असल्याचं खुद्द रेणुका यांनी सांगितलं होतं. रेणुका यांच्या व्यक्तिगत आयुष्याबद्दल सांगायचं तर लहान वयात त्यांना अनेक ताणतणांवाना सामोरं जावं लागलं होतं. रेणुका यांनी आशुतोष यांच्याबरोबर दुसरं लग्न केलं. रेणुका यांचं पहिलं लग्न प्रसिद्ध नाट्य दिग्दर्शक विजय केंकरे यांच्याशी झालं होतं. परंतु त्या दोघांचं नात फार काळ टिकलं नाही आणि ते कालांतरानं विभक्त झाले. त्यानंतर रेणुका यांच्या आयुष्यात आशुतोष आले.

अशी झाली पहिली भेट

रेणुका आणि आशुतोष यांची पहिली भेट दिग्दर्शक हंसल मेहता यांच्या ‘जयते’ सिनेमाच्या सेटवर झाली. आशुतोष रेणुका यांना ओळखत होते. परंतु रेणुका आशुतोषला ओळखत नव्हत्या. पहिल्या भेटीमध्येच आशुतोष रेणुका यांच्या प्रेमात पडले. दोघांमध्ये मैत्री झाली. एकमेकांचे फोन नंबरची देवाणघेवाण झाली.

त्यानंतर आशुतोष यांनी रेणुका यांना दिवाळीच्या शुभेच्छा द्यायला रेणुका यांना फोन केला. परंतु रेणुका यांनी काही कारणानं फोन घेतला नाही. त्यानंतर त्यांनी आशुतोष यांना फोन केला. त्यानंतर दोघांमध्ये एकमेकांशी बोलणं सुरू झालं आणि हळूहळू त्यांच्यात प्रेम फुलू लागलं. २००१ मध्ये दोघांनी लग्न केलं. आशुतोष आणि रेणुका यांना दोन मुलं आहेत. रेणुका आशुतोष यांना राणाजी म्हणून हाक मारतात. राणाजी आपल्या आयुष्यात आल्यामुळे खूप बदल झाले. त्यांच्यासारखा उत्तम जोडीदार असूच शकत नाही, असं मत रेणुका यांनी एका मुलाखतीमध्ये व्यक्त केलं होतं.