नाश्त्याच्या पोह्यांचा लगदा होतोय का? कसे बनवाल चविष्ट आणि सुटसुटीत पोहे, सोप्या टिप्स

​कसे निवडाल पोहे?​

पोहे हा घरातील नियमित नाश्ता असला तरीही कांदे पोहे अथवा बटाटे पोहे करताना कोणतेही पोहे निवडू नयेत. बाजारामध्ये जाडे पोहे, पातळ पोहे, मध्यम पोहे असे अनेक प्रकार मिळतात. पण फोडणीचे पोहे करताना जाड पोह्यांचा वापर करावा.

​पोह्यांची ओळख कशी करावी?​

फोडणीच्या पोह्यांसाठी लागणारे जाड पोहे हे ओळखायला सोपे असतात. डोळ्यांनी तुम्हाला कळत नसेल तरीही हाताने नक्कीच याची पडताळणी करता येऊ शकता. जाड पोहे हे लांब आकाराचे असतात आणि पातळ पोहे हे चपटे आणि पारदर्शक स्वरूपाचे असतात. चिवड्यासाठी पातळ पोह्यांचा वापर केला जातो. तर जाड पोह्यांचे फोडणीचे पोहे बनवले जातात.

(वाचा – चपातीची कणीक मळाल अशी, तर पोळ्या कधीच होणार नाहीत कडक आणि चिवट, सोप्या ट्रिक्स)

​पोहे कसे भिजवावे?​

पोह्याचा लगदा होऊ नये यासाठी सर्वात महत्त्वाची टीप लक्षात घ्यावी लागते ती पोहे भिजवण्याचे टेक्निक. लुसलुशीत पोहे हवे असतील तर तुम्ही पोहे योग्य पद्धतीने धुवायला हवेत.

• पोहे जास्त वेळ भिजवू नयेत. धुतल्यानंतर किमान ५ मिनिट्सचे अंतर राहील अशा पद्धतीने फोडणीची तयारी करा
• बरेच जण पोहे आधीच भिजवतात आणि ते तसेच काही वेळ भिजून पडून राहतात. त्यामुळे पोहे पाणचट आणि कडक होतात
• पोहे कधीही पाण्यात जास्त वेळ भिजवून ठेऊ नयेत हे लक्षात ठेवा. पोहे नेहमी चाळतीच धुवा
• पोह्यातील पाणी निघून जाईल असे ठेवा म्हणजे फोडणीला दिल्यावर लगदा होत नाही
• धुतलेल्या पोह्यातच हळद घातली तर ती सगळ्या पोह्यांना व्यवस्थित लागते