Dasara Melava 2022- अवधूत गुप्ते शिंदेंच्या दरबारी, बीकेसीतील मेळाव्यात सादर केले शिवसेना गीत

मुंबई- बीकेसीतील शिंदे गटाच्या दसरा मेळाव्यात गायक अवधूत गुप्ते आणि स्वप्निल बांदोडकरने मंचावर हजेरी लावली आहे. या दोघांनीही शिवसेना….शिवसेना हे पक्षगीत सादर केलेय. अवधूत एकनाथ शिंदेंच्या मंचावर जाणार का याबाबत चर्चा सुरू होती. अखेर आज अवधूतने शिंदे गटाच्या मंचावर हजेरी लावली आहे.

दसरा मेळाव्याच्या पार्श्वभूमीवर मैदान, पोस्टर, टीझर अशा वेगवेगळ्या पातळ्यांवर सुरु असलेलं वॉर आता गाण्यातूनही रंगू लागलं आहे. शिवसेनेचे गाणं गायलेले दोन्ही गायक शिंदे गटाच्या व्यासपीठावरून गाणं गाताना दिसले. हजारो शिवसैनिकांसमोर नव्या जोमात गुप्ते-बांदोडकरांच्या जोडगोळीने गाणं गायलं. शिंदे गटाच्या दसऱ्या मेळाव्यासाठी बीकेसी येथे राज्यभरातून शिवसैनिक आले आहेत. यावेळी मुख्यमंत्री एकनाथ शिंदे काय भाषण करतील याकडे सर्वांचं लक्ष लागून राहिलं आहे. यातच अनेक मराठी कलाकार आणि गायक परफॉर्म करताना दिसत आहेत. ज्येष्ठ अभिनेते शरद पोंक्षेसह गायक नंदेश उमपही बीकेसी येथे उपस्थित आहे.

दरम्यान, एकनाथ शिंदे यांच्या वाढदिवसानिमित्त फेब्रुवारी महिन्यात आयोजित कार्यक्रमात अवधूत गुप्तेंनी भाषण केलं होतं. एकनाथ शिंदे यांच्याविषयी बोलावं तितकं कमीच, असं गुप्ते म्हणाले होते. त्यावेळी ‘लोकनाथ’ हे गाणं अवधूत गुप्ते यांनी गायलं होतं. उर्मिला मातोंडकर, सुनील शेट्टी यासारख्या कलाकारांसोबत झालेली ओळख हे मला मिळालेलं रिटर्न गिफ्ट असल्याच्या भावना गुप्तेंनी त्यावेळी बोलून दाखवल्या होत्या.

याचमुळे अवधुत शिंदे गटात जाणार का अशा चर्चांनाही सुरुवात झाली होती. मात्र महाराष्ट्र टाइम्स ऑनलाइनला दिलेल्या प्रतिक्रियेत त्यांनी स्पष्ट केलं की, ‘कलाकार हा फक्त कलाकार असतो. मी याआधीही अनेक पक्षांसाठी गाणी गायली, लिहिली आणि संगीतबद्ध केली आहेत. मी खास असं शिंदे गटासाठी म्हणून वेगळं गाणं केलेलं नाही. महेश- चिनार यांनी बनवलेलं गाणंच मी सादर करत आहे. त्यामुळे जर मी शिंदे गटासाठी गाणं गात आहे याचाअर्थ मी त्या पक्षाचं सदस्यत्व घेतलं असा होत नाही.’