असं काय झालं की संकर्षण कऱ्हाडेला मुंबईतच ‘भेटली’ परभणी, म्हणाला- भरून पावलो

मुंबई– अभिनयात करिअर करण्यासाठी महाराष्ट्राच्या कानाकोपऱ्यातून मुंबईत आलेले अनेक कलाकार आपण पाहतो. त्यांच्या प्रवासाच्या गोष्टी ऐकायला चाहत्यांना आवडतं. कामासाठी कितीही मुंबईकर झाले तरी या कलाकारांचं पहिलं प्रेम हे त्यांच्या गावावर, शहरावर असतं. मग संधी मिळेल तेव्हा ते आपल्या गावाकडच्या गोष्टी चाहत्यांशी शेअर करत असतात. शूटिंगमधून सुट्टी मिळाली की ते आपलं गाव गाठतात. पण जर हेच त्यांचं गाव त्यांना मुंबईतच अनुभवता आलं तर काय मज्जा येईल ना. असच काहीसं झालं अभिनेता संकर्षण कऱ्हाडे याच्याबाबतीत. मुंबईतील गडकरी रंगायतनच्या दारात संकर्षणच्या भेटीला चक्क परभणीच आलं.

संकर्षण त्याच्या आयुष्यातील अगदी छोट्या छोट्या गोष्टी सोशल मीडियावर शेअर करत असतो. त्याची कविता असो किंवा जुळ्या मुलांसोबतचे क्षण असोत. गेल्या १८ दिवसांपासून संकर्षण त्याच्या नव्या सिनेमाच्या शूटिंगसाठी लंडनच्या मुक्कामी होता. तिथेही त्याला भेटलेली माणसं, त्यांच्या कला संकर्षणने त्याच्या खास कथनशैलीत शेअर केल्या.

संकर्षण हा अभिनयासोबत उत्तम लेखक, दिग्दर्शक आणि निवेदकही आहे. सध्या तो माझी तुझी रेशीमगाठ या मालिकेत समीर ही भूमिका साकारत आहे. त्याशिवाय तू म्हणशील तसं या नाटकात प्रमुख भूमिकाही करत आहे. सारखं काहीतरी होतंय या नाटकाचं दिग्दर्शनही संकर्षणने केलं आहे. नुकताच आम्ही सारे खवय्ये हा शो सुरू झाला असून या शोचं निवेदन करतानाही संकर्षण दिसत आहे. संकर्षण इतका बिझी आहे की त्याला गेल्या खूप दिवसात परभणीला आईबाबांना भेटायला जायला जमलं नाही. ही खंत त्याच्या मनात असतानाच अचानक त्याला परभणीला जाऊन आल्याचा अनुभव आला तर आनंद होणारच ना.

संकर्षणच्या ‘तू म्हणशील तसं’ या नाटकाचा प्रयोग मुंबईतील गडकरी रंगायतनमध्ये होता. हा प्रयोग संपवून घरी जाताना नाट्यगृहाबाहेर त्याला एक कुटुंब भेटलं. नवरा, बायको आणि मुलगी असं ते चौकोनी कुटुंब संकर्षणला बघून थांबलं. ते संकर्षणला म्हणाले, आम्ही पण परभणीचे आहोत. दिवाळीला परभणीला जाणार आहोत. त्यांनी असं म्हणताच संकर्षणला खूप आनंद झाला. मग काय संकर्षणने त्या कुटुंबासोबत फोटो काढला आणि सोशल मीडियावर शेअर केला. या फोटोत संकर्षणने लिहिलं की, ‘अहो, आपल्या गावची एस. टी. दिसली तरी आनंद होतोय, इथे तर मला माझ्या परभणीची माणसं भेटली. ही तर माझ्या गावाकडची माणसं.’

संकर्षणला कामाच्या व्यापामुळे दसरा, दिवाळीला परभणीला जायला मिळणार नाही याचं वाईट वाटत असतानाच त्याला मुंबईतच परभणी भेटल्याचा आनंद त्या कुटुंबाने दिला. संकर्षणचा हा फोटो त्याच्या चाहत्यांना खूपच आवडलाय. कामासाठी कुठेही फिरावं लागलं तरी आपल्या गावाशी असलेली नाळ जोडून ठेवणाऱ्या कलाकारांमध्ये संकर्षणने बाजी मारली आहे.