अंगणवाडी सेविकांना दुहेरी आनंद, २० हजार पदे भरण्यासोबत मानधनही दुप्पट?

राज्यात अनेक ठिकाणी भाडेतत्त्वावर अंगणवाडी भरविल्या जातात. अशा अंगणवाड्यांना अत्यंत तुटपुंजे भाडे देण्यात येते. काही ठिकाणी ३ ते ४ हजार रुपयेच भाडे मिळते. त्यामुळे या अंगणवाड्यांचे भाडे वाढवून देण्याबाबतही सरकार विचार करत असल्याचे सांगण्यात आले. याशिवाय राज्यातील अंगणवाड्यांची संख्या वाढविण्यासाठी महिला व बालविकास विभागामार्फत नवा प्रस्तावांच्या हालचालींना वेग आला असून त्या माध्यमातून राज्यातील ग्रामपंचायत आणि इतर भागातील शाळांमधील सुमारे २० हजार खोल्या अंगणवाड्यांसाठी देण्याबाबत निर्णय घेण्यात येणार आहे. त्यामुळे राज्यातील अंगणवाड्यांची संख्या वाढणार असल्याची माहिती आहे.

राज्यभरातील पालिकांमध्ये होणार भरती, मुख्यमंत्र्यांची मोठी घोषणा
राज्यातील अंगणवाडी सेविकांनी आपल्या विविध मागण्यांसाठी मध्यंतरी आझाद मैदानावर आंदोलन केले होते. त्यावेळी मुख्यमंत्री एकनाथ शिंदे यांनी या मागण्यांबाबत सकारात्मक निर्णय घेण्याचे आश्वासन दिले. या पार्श्वभूमीवर ‘वर्षा’वर बैठक झाली. या बैठकीत अंगणवाडी कर्मचाऱ्यांच्या विविध मागण्यांवर चर्चा करण्यात आली. उपमुख्यमंत्री देवेंद्र फडणवीस यावेळी उपस्थित होते. अंगणवाडी सेविका, अंगणवाडी मदतनीस आणि मिनी अंगणवाडी सेविकांच्या २० हजार १८६ पदांच्या भरतीला मान्यता मिळाली असून ही भरती प्रक्रिया सहा महिन्यांत पूर्ण करण्याचे निर्देश शिंदे यांनी बैठकीत दिले.