अखेरच्या व्हिडिओतूनही हसवून गेले राजू श्रीवास्तव; ते वेदनादायी दिवस सुरू होण्यापूर्वी केलेली पोस्ट

मुंबई: आपल्या कॉमेडीतून चाहत्यांना खळखळून हसवणाऱ्या राजू श्रीवास्तव (Raju Srivastava Death) यांचे निधन झाले. २१ सप्टेंबर रोजी त्यांनी अखेरचा श्वास घेतला. गेल्या ४० दिवसांपासून ते दिल्लीतील एम्स रुग्णालयात उपचार घेत होते. १० ऑगस्ट रोजी त्यांना हृदयविकाराच्या झटका आल्याने रुग्णालयात भरती करण्यात आले होते. त्याआधी त्यांनी इन्स्टाग्रामवर एक व्हिडिओ शेअर केलेला. त्यांचा हा व्हिडिओ सोशल मीडियावर व्हायरल झाला आहे. शेवटच्या व्हिडिओतूनही राजू यांनी चाहत्यांना हसवले.

जेव्हा कधी राजू कॅमेऱ्यासमोर यायचे तेव्हा ते लोकांना हसवायचे. जातानाही त्यांनी लोकांच्या चेहऱ्यावर हसू (Raju Srivastava Last Video) आणले आहे. रुग्णालयात दाखल होण्याआधी त्यांनी शेअर केलेल्या व्हिडिओ करोना कॉलर ट्यूनविषयी विनोदी व्हिडिओ बवलसा होता. अमिताभ बच्चन यांच्या आवाजाताली करोना कॉलर ट्यूनविषयी त्यांनी या विनोदी व्हिडिओ बनवला आहे. त्यांनी या व्हिडिओत शशी कपूर, विनोद खन्ना यांच्या आवाजात ही कॉलर ट्यून कशी ऐकू येईल हे खास शैलीत बोलून दाखवले आहे.

हे वाचा-राजू यांनी रिक्षा चालवून भरलेली पोटाची खळगी; आज दारात उभी ऑडी अन् BMW!

या व्हिडिओमध्ये त्यांनी करोनविषयी खबरदारी घेण्याचा सल्लाही दिला असून त्यांनी पूर्ण व्हिडिओ युट्यूबवर रिलीज केला आहे. राजू रुग्णालयात भरती होण्यापूर्वी शेअर करण्यात आलेल्या या व्हिडिओवर अनेकांनी त्यांच्या प्रकृती स्वास्थ्याविषयी प्रार्थना केली होती. मात्र गेले ४० दिवस मृत्यूशी सुरू असणारी त्यांची लढाई २१ सप्टेंबर रोजी संपली आहे. राजू यांच्या जाण्याने मनोरंजन विश्वात एक न भरून टाकणारी पोकळी निर्माण झाली आहे.

कानपूरमधून आलेल्या राजू यांनी मुंबईत आपली एक ओळख निर्माण केली होती. त्यांचे वडील कवी होते, वडिलांप्रमाणे प्रसिद्ध होण्याचं स्वप्न उराशी बाळगून मुंबईत आलेल्या राजू यांनी सुरुवातीच्या काळात खूप कष्ट सहन केले. त्यानी विविध बॉलिवूड सिनेमात छोटे-मोठे काम केलं होतं. पण त्यांना खरी ओळख मिळवून दिली ती ‘द ग्रेट इंडियन लाफ्टर चॅलेंज’ने. या शोमधील त्यांचे व्हिडिओ आजही चाहते आवडीने पाहतात.