एक हंगाम खराब गेला तर पूर्ण संघच बदलला, फक्त प्रशिक्षकच नाही तर मुंबई इंडियन्सनं केले मोठे बदल

मुंबई: आयपीएल मधील सर्वाधिक जेतेपद जिंकणारा मुंबई इंडियन्स संघ आहे. मुंबई इंडियन्समध्ये अनेक विविध स्टार खेळाडू आहेत. पण आयपीएल २०२० मध्ये या संघाला जेतेपद पटकावता आले नाही. आता मुंबई इंडियन्स फ्रँचायझीने आपला विस्तार केला आहे. त्यानंतर त्यांनी महेला जयवर्धने आणि झहीर खान यांना या फ्रँचायझीमधील महत्त्वाच्या भूमिका पार पाडण्याची जबाबदारी दिली आहे.
आता मुंबई इंडियन्सला नवा प्रशिक्षक मिळाला आहे. ५ वेळा चॅम्पियन संघाने मार्क बाउचरवर ही जबाबदारी सोपवली आहे. दक्षिण आफ्रिकेचा सर्वोत्तम यष्टीरक्षक फलंदाज असलेला बाउचर २०२३ साठी संघाला तयार करेल. सध्या ते दक्षिण आफ्रिका पुरुष क्रिकेट संघाचे मुख्य प्रशिक्षक आहेत, परंतु पुढील महिन्यात सुरू होणाऱ्या टी-२० विश्वचषकानंतर ते पद रिक्त करतील. मुंबई इंडियन्सने महेला जयवर्धनेला त्यांचे ग्लोबल परफॉर्मन्स हेड म्हणून बढती दिली आहे, त्यामुळेच संघ आता नवीन प्रशिक्षकाच्या शोधात होता.

टी २० कोचिंगचा अनुभव नाही

मार्क बाउचरला टी २० फ्रँचायझी सर्किटमध्ये कोचिंगचा फारसा अनुभव नाही. बाउचरला २०१६ च्या आयपीएलमध्ये कोलकाता नाईट रायडर्समध्ये यष्टिरक्षक प्रशिक्षकाची भूमिका मिळाली. तो नाईट रायडर्सकडून खेळाडू म्हणून खेळला देखील आहे. रॉयल चॅलेंजर्स बंगळुरूमधून मार्कने आयपीएल कारकिर्दीची सुरुवात केली. २००८ ते २०११ या कालावधीत स्पर्धा खेळल्यानंतर, त्याने दक्षिण आफ्रिकेच्या देशांतर्गत सर्किटवर टायटन्सचे मुख्य प्रशिक्षक म्हणून पदभार स्वीकारला. नंतर त्याने दक्षिण आफ्रिकेच्या पुरुष संघाचे प्रशिक्षक म्हणून काम सुरू केले.

जयवर्धने आयपीएलचा दुसरा सर्वात यशस्वी प्रशिक्षक

२०१७ मध्ये मुख्य प्रशिक्षक म्हणून नियुक्त झालेला जयवर्धने हा आयपीएल इतिहासातील दुसरा सर्वात यशस्वी प्रशिक्षक आहे. महेलाच्या कार्यकाळात मुंबई इंडियन्स ३ वेळा चॅम्पियन बनली. स्टीफन फ्लेमिंग हे स्पर्धेतील सर्वोत्कृष्ट प्रशिक्षक आहेत. २००९ पासून ही भूमिका चोख बजावणाऱ्या फ्लेमिंगच्या खात्यात ४ ट्रॉफी आहेत. जयवर्धने आणि रोहित शर्मा या जोडीने ६ हंगामात एकत्र प्लेऑफ गाठले.

आता रिलायन्स जिओइन्फोकॉमच्या मालकीचे तीन क्रिकेट संघ आहेत. इंडियन प्रीमियर लीगमधील मुंबई इंडियन्स, यूएई लीगसाठी संघाचे नाव ‘एमआय एमिरेट्स’ असेल, तर दक्षिण आफ्रिका लीगमध्ये ते ‘एमआय केपटाऊन’ असेल. दोन्ही संघ आयपीएलमध्ये मुंबई इंडियन्स फ्रँचायझीप्रमाणेच जर्सी घालतील. आयपीएल २०२२ मध्ये मुंबईला १४ पैकी फक्त ४ सामने जिंकता आले आणि गुणतालिकेत शेवटचे स्थान मिळाले.

आपल्या नवीन भूमिकेबद्दल भाष्य करताना मार्क बाउचर म्हणाला, “मुंबई इंडियन्सचे मुख्य प्रशिक्षक होणे, हा सन्मान आणि विशेषाधिकार आहे. मुंबई इंडियन्सचा इतिहास आणि कामगिरी यामुळे ती क्रीडा इतिहासातील सर्वात यशस्वी फ्रँचायझी बनली आहे. मी आव्हानांसाठी तयार आहे आणि परिणामांच्या गरजेचा आदर करतो. हे उत्कृष्ट नेतृत्व आणि खेळाडू असलेले एक मजबूत युनिट आहे. मी या गतिमान घटकात माझी भूमिका निभावण्यासाठी उत्सुक आहे.”