‘झेडपी’त दोन हजारांवर पदांची भरती

ग्रामविकास विभागाने राज्यातील जिल्हा परिषदांमध्ये गट क संवर्गातील एकूण रिक्त जागांपैकी ८० टक्के जागा भरण्यास हिरवा कंदील दाखविला आहे. त्यानुसार ही भरतीप्रक्रिया होणार असल्याने कामकाजात सुसूत्रता येण्यास मदत होणार आहे. जिल्ह्यातील ग्रामीण भागाच्या विकासात महत्त्वपूर्ण भूमिका बजावताना जिल्हा परिषदेसारख्या यंत्रणेस तीन वर्षांपासून मनुष्यबळाच्या कमतरतेस सामोरे जावे लागत आहे. आरोग्य, शिक्षण आणि मूलभूत सुविधा पुरवितानाही मनुष्यबळाची वानवा यंत्रणेला जाणवत आहे. त्यामुळे कर्मचारी भरतीची गरज निर्माण झाली होती.

ग्रामविकास विभागाच्या वेळापत्रकानुसार फेब्रुवारीच्या पहिल्या आठवड्यात जाहिरात प्रसिद्ध केली जाणार आहे. निवड मंडळाच्या माध्यमातून भरतीप्रक्रिया राबविण्यात येईल. या जागा भरण्याच्या अनुषंगाने रिक्त जागांचा अंतिम आराखडा जिल्हा परिषदेने राज्य सरकारला पाठविला आहे. त्यानुसार जिल्हा परिषदेत सर्व विभाग मिळून गट क आणि गट ड या संवर्गातील सुमारे दोन हजार ७२६ जागा रिक्त असून, त्यातील दोन हजार ५३८ जागा गट क संवर्गात येतात. क संवर्गासाठीच ही भरती होणार आहे.

राज्याच्या ग्रामविकास विभागाअंतर्गत बंपर भरती

…अशी पार पडेल प्रक्रिया

-बिंदुनामाली व रिक्त जागांच्या संख्यानिहाय आरक्षण निश्चिती : ३१ जानेवारी २०२३ पर्यंत

-भरतीप्रक्रियेसाठी कंपनीची निवड : ३१ जानेवारी २०२३

-जाहिरात प्रसिद्धी : १ ते ७ फेब्रुवारी

-उमेदवारी अर्ज मागविणे : ८ ते २२ फेब्रुवारी

-अर्ज छाननी प्रकिया : २३ फेब्रुवारी ते १ मार्च

-पात्र उमेदवारांची यादी : २ ते ५ मार्च

-उमेदवारांना परीक्षा प्रवेशपत्र उपलब्धी : ६ ते १३ एप्रिल

-परीक्षा कालावधी : १४ ते ३० एप्रिल

-परीक्षेचा निकाल आणि नियुक्त्या : १ ते ३१ मे