पालिकेच्या सीबीएसई शाळेला मान्यतेची प्रतीक्षा

अन्य शहरांमधील महापालिका शाळा बंद करण्याची वेळ आलेली असताना, नवी मुंबईत मात्र पालिका शाळांमधील विद्यार्थीसंख्या वाढत आहे. या शाळांमधून सर्व शैक्षणिक सुविधा मोफत पुरवल्या जात असून दहावीचा निकालही उत्तम लागत आहे. महापालिकेच्या वतीने दहावीपर्यंत एसएससी बोर्डाच्या शाळा चालवल्या जातात. इंगजी माध्यमाच्या शाळांसाठी पालकांची मागणी लक्षात घेता, महापालिकेने पाच वर्षांपूर्वी सीवूड येथे सीबीएसई बोर्डाची शाळा सुरू केली आहे.

त्यापाठोपाठ दोन वर्षांनी बोनकोडे गावालगत सीबीएसईची दुसरी शाळा सुरू केली आहे. या शाळांमध्ये पाचवी पर्यंतचे वर्ग भरत असून विद्यार्थ्यांना मोफत शिक्षण दिले जात आहे. येथेही आवश्यक शैक्षणिक साहित्य मोफत पुरवले जात आहे. त्यामुळे या शाळांमध्ये प्रवेश घेण्यासाठी दरवर्षी पालकांची झुंबड उडते. आताही नर्सरीच्या प्रवेशासाठी शाळेबाहेर पालकांची रीघ लागायला सुरुवात झाली आहे.

असे असताना, सीबीएसई बोर्डाच्या या शाळेला केंद्रीय बोर्डाची मान्यताच मिळालेली नसल्याची माहिती समोर आली आहे. त्यामुळे पालकांची चिंता वाढली आहे. मान्यता नसलेल्या इतर खासगी शाळांची यादी महापालिका दरवर्षी जाहीर करते आणि या शाळांमध्ये प्रवेश घेऊ नका, असे आवाहन पालकांना करते. मात्र असे असताना, महापालिकेच्याच शाळांना अजून मान्यता मिळालेली नाही. त्यामुळे या शाळेतील विद्यार्थ्यांच्या पालकांना आपल्या मुलांच्या भवितव्याची चिंता सतावू लागली आहे. याबाबत सामाजिक, राजकीय कार्यकर्त्यांनीही आवाज उठवायला सुरुवात केली आहे.

याबाबत महापालिका शिक्षण विभागाकडे विचारणा केली असता त्यांनी सांगितले की, शाळेला केंद्रीय बोर्डाची मान्यता मिळालेली नाही, मात्र राज्य सरकारच्या शिक्षण विभागाच्या सर्व मान्यता मिळालेल्या आहेत. त्यामुळे विद्यार्थ्यांचे कोणतेही शैक्षणिक नुकसान होणार नाही.

दहावी, बारावी परीक्षांसंदर्भात विद्यार्थ्यांसाठी महत्वाच्या सूचना जाहीर
या शाळा सीबीएसई बोर्डाच्या आहेत, त्यामुळे त्यांना केंद्रीय मंजुरी गरजेची आहे. ती मिळवण्यासाठी महापालिकेचे प्रयत्न सुरू आहेत. त्यासाठी एजन्सी नेमण्याची कार्यवाही सुरू करण्यात आली आहे. या क्षेत्रातील संबंधित एजन्सी हे काम सफाईदारपणे करू शकणार आहे. शाळा मान्येसाठी प्रस्ताव तयार झाला असून लवकरच ही मान्यता मिळून जाईल. विद्यार्थ्यांचे कोणतेही नुकसान होणार नाही.
– योगेश कडुस्कर, महापालिका उपायुक्त, शिक्षण विभाग

सीबीएसई शाळेला केंद्राची मान्यता तातडीने मिळवावी, यासाठी आयुक्तांना निवेदन देण्यात आले. शिक्षण विभागाने शाळेचे पालक व विभागातील सर्वपक्षीय कार्यकर्ते, समाजसेवक यांची बैठक तातडीने लावून या संदर्भातील आपली भूमिका स्पष्ट करावी. याला जबाबदार शिक्षण अधिकाऱ्यांवर कारवाई करण्यात यावी.
– विशाल चंद्रकांत विचारे, शाखाप्रमुख, उद्धव ठाकरे शिवसेना पक्ष

सीवूड शाळा

स्थापना २०१५

विद्यार्थी संख्या – पूर्व प्राथमिक ५५०, प्राथमिक ६२५, एकूण १,१७५

बोनकोडे शाळ

स्थापना -२०१८

विद्यार्थी संख्या – पूर्व प्राथमिक ५७४, प्राथमिक ६६६, एकूण १,२४०

गणवेश दिरंगाईनंतर पालिकेच्या विद्यार्थ्यांना आता पोषण आहाराची चिंता