सीबीएसई टर्म १ चा निकाल (CBSE Board Term 1 Result)अधिकृत वेबसाईटवर जाहीर करण्यात आला नसून तो थेट शाळांना पाठवण्यात आला आहे. सीबीएसई बोर्डाच्या दहावी आणि बारावीच्या विद्यार्थ्यांना शाळेच्या मुख्याध्यापकांकडून टर्म १ चे गुण देण्यात आले आहेत. (CBSE Board Result) दरम्यान, मध्य प्रदेशातून एक धक्कादायक घटना समोर आली आहे. काही मीडिया रिपोर्ट्सनुसार, भोपाळच्या विंध्याचल अकादमीमध्ये दहावी आणि बारावीत शिकणारे सर्व विद्यार्थी नापास झाले आहेत.
सीबीएसई बोर्डाचा निकाल पाहून पालक संतप्त
भोपाळमधील विंध्याचल अकादमीमध्ये इयत्ता दहावी आणि बारावीत शिकणाऱ्या सर्व विद्यार्थ्यांच्या पालकांना सीबीएसई बोर्डाचा निकाल पाहून धक्का बसला आहे. प्रत्यक्षात या शाळेतील सर्वच विद्यार्थी नापास झाले आहेत. याकडे शाळा व्यवस्थापन दुर्लक्ष करत असल्याचा आरोप पालकांनी केला आहे. यासोबतच पालकांनी सीबीएसई विभागीय कार्यालयात शाळेविरुद्ध तक्रार दाखल केली आहे.
क्लास टॉपर देखील नापास
विद्यार्थ्यांना नापास दाखविल्याने सीबीएसई बोर्डाच्या इयत्ता दहावी आणि बारावीत शिकणाऱ्या विद्यार्थ्यांच्या संतप्त पालकांनी शाळेला घेराव घातला. दुसरीकडे मुख्याध्यापकांनी परीक्षा केंद्रात गोंधळ असल्याचा आरोप केला आहे. शाळेत शिकणारे दहावी आणि बारावीचे टॉपरही नापास झाल्याचे त्यांनी सांगितले. शाळेतील इयत्ता दहावी आणि बारावीचे केंद्र राजीव गांधी शाळा येथे होते. तेथे मुलांचे मार्क्स भरण्यात आले. त्यामुळे तेथूनही मोठी चूक होण्याची शक्यता आहे.