MajhiNews Marathi News, Latest Marathi News, Marathi News Paper, Maharashtra Breaking News | मराठी ताज्या बातम्या
सावित्रीबाई फुले पुणे विद्यापीठाच्या अंतर्गत लेखा परीक्षणात ‘क’ दर्जा मिळवणाऱ्या मराठी, वाणिज्य आणि भूगोल विभागाकडून स्पष्टीकरण मागवण्याचा निर्णय विद्यापीठ प्रशासनाने घेतला आहे. याशिवाय विभागांचा शैक्षणिक दर्जा उंचावण्यासाठी समितीकडून सूचना करण्यासोबतच, उपाययोजनांचे मार्गदर्शन करण्यात येणार आहे. ‘ब’ दर्जा मिळालेल्या विभागांना ‘अ’ दर्जा मिळावा, यासाठी प्रयत्न करण्यात येणार असल्याचेही विद्यापीठाने स्पष्ट केले.
विद्यापीठाच्या शैक्षणिक विभागांच्या अंतर्गत शैक्षणिक लेखा परीक्षणाबाबत ‘महाराष्ट्र टाइम्स’मध्ये वृत्त प्रकाशित झाल्यानंतर, विद्यापीठाच्या वरिष्ठ अधिकाऱ्यांनी बैठक घेऊन चर्चा केली. बैठकीत प्र-कुलगुरू डॉ. संजीव सोनवणे, अधिष्ठाता डॉ. मनोहर चासकर, डॉ. पराग काळकर, डॉ. संजय ढोले यांच्यासह अन्य अधिकारी उपस्थित होते. बैठकीत परीक्षण अहवाल स्वीकारून ‘क’ आणि ‘ब’ दर्जा मिळालेल्या विभागांची चर्चा करण्यात आली.
मराठी विभागामध्ये प्राध्यापकांच्या जागा रिक्त
‘मराठी, भूगोल आणि वाणिज्य विभागाला क दर्जा मिळाल्याची गंभीर दखल विद्यापीठाने घेतली आहे. विभागांचा दर्जा का घसरला याबाबत स्पष्टीकरण मागवले आहे. संबंधित विभागाच्या प्रमुखांनाही शैक्षणिक दर्जा सुधारण्यासाठी आवश्यक उपाययोजना करण्याच्या सूचना दिल्या आहेत. सोबतच ब दर्जा मिळालेल्याही विभागांसाठी आवश्यक शैक्षणिक सुविधा निर्माण करून दर्जा उंचाविण्याबाबत मार्गदर्शन करण्यात येईल,’ अशी माहिती डॉ. सोनवणे यांनी दिली.
अंतर्गत लेखा परीक्षणात ‘क’ आणि ‘ब’ दर्जा मिळवणाऱ्या शैक्षणिक विभागांवर टास्क फोर्सद्वारे विशेष लक्ष ठेवण्यात येईल. या फोर्सच्या सदस्यांकडून विभागांना भेटी देऊन, त्यांचे शैक्षणिक मूल्यांकन उंचावण्यासाठी आवश्यक सूचना देण्यात येईल. त्यानुसार विभागांना कार्यवाही करावी लागेल. त्यामुळे आगामी काळात सर्व विभागांचा शैक्षणिक दर्जा वाढेल, असा विश्वास वाटतो.
– डॉ. संजय ढोले, संचालक, अंतर्गत गुणवत्ता सिद्धता कक्ष
‘मराठी विभागाचा दर्जा सुधारा’
विद्यापीठाच्या मराठी विभागाला ‘क’ दर्जा मिळाल्याने महाराष्ट्र नवनिर्माण विद्यार्थी सेनेने तीव्र नाराजी व्यक्त केली आहे. परकीय भाषा विभागांना ‘अ’ दर्जा मिळतो आणि मराठी भाषा विभागाला ‘क’ दर्जा कसा मिळतो, असे प्रश्न मनविसेच्या शिष्टमंडळाने उपस्थित केला आहे. ‘विभागात केवळ पुरेसे प्राध्यापक नाहीत, म्हणून मराठी विभागाचा दर्जा घसरतो, हे पुरेसे कारण नाही. विभागात अनेक त्रुटी आहेत, याचे स्पष्टीकरण विद्यापीठाने द्यावे. मराठी विभागाच्या दर्जामध्ये सुधारणा होण्याच्या दृष्टीने, विद्यापीठाच्या प्रशासनाने तातडीने पावले उचलावीत अन्यथा तीव्र आंदोलन करण्यात येईल,’ असा इशारा शिष्टमंडळाने दिला. याबाबतचे निवेदन डॉ. सोनवणे यांना देण्यात आले. या शिष्टमंडळात मनविसे शहरप्रमुख अमोल शिंदे, शशांक अंराळे, आनंद बापट, महेश भोईबार, अशोक पवार, ओमकार तुपे आदी पदाधिकारी होते.
