सावित्रीबाई फुले पुणे विद्यापीठाचे आठ निकाल अद्यापही रखडले

राज्यभरातील सर्व विद्यापीठाने ऑनलाइन परीक्षांचा मार्ग स्वीकारलेला असताना, सावित्रीबाई फुले पुणे विद्यापीठाने मात्र यंदा ऑफलाइन परीक्षा घेण्याचा निर्णय घेतला. हा निर्णय घेईपर्यंत जून महिना उजाडल्याने शैक्षणिक वर्ष २०२१-२२ च्या दुसऱ्या सत्राच्या परीक्षा २० जूनपासून करण्यात आल्या. टप्प्या-टप्प्याने सुरू झालेल्या या परीक्षा ऑक्टोबरच्या मध्यावधीत संपलेल्या असल्या तरी अद्यापही विद्यापीठामार्फत ८ अभ्यासक्रमांचे निकाल जाहीर होणे बाकी आहे.

नोव्हेंबर महिना उजाडला तरी हे निकाल जाहीर झालेले नसल्यामुळे या विद्यार्थ्यांना पुढील प्रवेशात अनेक अडचणी येत आहेत. बीएड, एमएड व एमबीए अभ्यासक्रमाच्या विविध जुन्या पॅटर्नच्या परीक्षांचे हे निकाल असून, ते लवकरात लवकर जाहीर करण्याची मागणी विद्यार्थ्यांमधून होत आहे.

MPSC Exam: राज्यसेवा परीक्षांचे वेळापत्रक जाहीर

विद्यार्थी मागे पडण्याची भीती

विद्यापीठामार्फत अनेक अभ्यासक्रमांचे जवळपास १० ते १२ वर्षांचे जुने पॅटर्नसही अद्याप सुरू ठेवण्यात आले आहेत. या पॅटर्नची परीक्षा उशिरा घेण्यात आल्यामुळे हे निकाल अद्याप जाहीर करण्यात आलेले नसल्याचे विद्यापीठाच्या परीक्षा विभागामार्फत सांगण्यात आले. तसेच येत्या आठवड्याभरात हे निकाल जाहीर केले जाणार असल्याची माहिती परीक्षा नियंत्रक डॉ. महेश काकडे यांनी याबाबत बोलताना दिली. हे निकाल आठवड्याभरात जाहीर केले जाणार असले, तरी अन्य विद्यापीठांचे निकाल जाहीर झाल्यामुळे पुढील प्रवेशाच्या स्पर्धेत पुणे विद्यापीठाचे विद्यार्थी मागे पडण्याची भीती शिक्षण क्षेत्रातून व्यक्त होत आहे.

विद्यापीठामार्फत घेण्यात आलेल्या सर्व परीक्षांचे निकाल ३० दिवसांच्या आत जाहीर करण्यात आले आहेत. जशा परीक्षा होतील, तसेच निकाल जाहीर करावे लागणार आहेत. त्यामुळे ज्या परीक्षा ऑक्टोबर मध्यावधीमध्ये संपल्या त्यांचे निकाल ३० दिवसांच्या आत जाहीर करण्याची जबाबदारी आमची आहे. त्यानुसार आम्ही ते करू.

– डॉ. महेश काकडे, परीक्षा नियंत्रक, सावित्रीबाई फुले पुणे विद्यापीठ

सावित्रीबाई फुले पुणे विद्यापीठाकडून परीक्षांसदर्भात अपडेट