मराठवाडा विद्यापीठात बायोमेट्रिक सुरु; विद्यार्थ्यांसह, प्राध्यापक, कर्मचाऱ्यांना नोंदवता येणार उपस्थिती

विद्यापीठाने विभागातील संशोधक विद्यार्थी, वसतिगृहातील उपस्थितीही बायोमेट्रिक पद्धतीने नोंदविण्यासाठीची प्रक्रिया सुरु केली. संशोधक विद्यार्थ्यांसह विभागातील प्राध्यापक, शिक्षकेतर कर्मचारी यांना बायोमेट्रिक नोंदणी बंधनकारक आहे. कर्मचाऱ्यांची बायोमेट्रिक उपस्थिती वेतनाशी जोडण्यात येणार असल्याचे कुलगुरू डॉ. येवले यांनी स्पष्ट केले. त्यासह विद्यार्थ्यांची उपस्थिती नोंदविण्याच्या प्रक्रियेला सुरुवात करण्यात आली आहे. त्यासाठी आवश्यक बायोमेट्रिक यंत्रणा बसविण्यात येत आहे.

विभागनिहाय संशोधक विद्यार्थ्यांची नोंदणी, त्याबाबतची प्रक्रिया सुरु आहे. विद्यापीठात विविध ५१ शैक्षणिक विभाग आहेत. यातील ४२ विभागांमध्ये संशोधक विद्यार्थी विविध विषयात संशोधन करत आहेत. यासह सारथी, बार्टी, जेआरएफ शिष्यवृत्तीधारक विद्यार्थ्यांचा समावेश आहे. विद्यार्थी संघटनांकडून बायोमेट्रिकला विरोधही होत आहे. परंतु प्रशासन बायोमेट्रिकबाबत ठाम असून प्रक्रिया आठ दिवसात पूर्ण होईल, असे स्पष्ट करण्यात आले आहे.

‘विद्यार्थ्यांसाठी सोयीसुविधा वाढविणार’

‘विद्यापीठाने विभागांना शैक्षणिक स्वायतत्ता देऊन पहिले पाऊल उचलले आहे. नवीन वर्षात जास्तीत जास्त महाविद्यालयांना स्वायत्तता देण्याचा; तसेच विद्यार्थ्यांच्या सोयीसुविधा वाढविण्याचा संकल्प आहे,’ अशी प्रतिक्रिया डॉ. येवले यांनी व्यक्त केली. नूतन वर्षानिमित्त विविध संकल्प ठरविले आहेत. या संदर्भात ते म्हणाले, ‘नवीन शैक्षणिक धोरण प्रभावीपणे राबविण्याचा आमचा प्रयत्न आहे. ‘स्किल बेस्ड एज्युकेशन’ व ‘स्टुडंट सेंट्रिक अ‍ॅडमिनिस्ट्रेशन’ या नव्या धोरणाची मुख्य संकल्पना आहे.’ या वेळी प्र-कुलगुरू डॉ. श्याम शिरसाठ, कुलसचिव डॉ. भगवान साखळे, वित्त व लेखाधिकारी प्रदीपकुमार जाधव, परीक्षा मंडळ संचालक डॉ. गणेश मंझा, अधिष्ठाता डॉ. भालचंद्र वायकर, डॉ. वाल्मिक सरवदे, आविष्कारचे समन्वयक डॉ. रत्नदीप देशमुख, डॉ. मुस्तजीब खान, डॉ. कैलास पाथ्रीकर, संयोजक एस. जी. शिंदे आदींची उपस्थिती होती.

सम्यक विद्यार्थी संघटनेची निदर्शने

औरंगाबाद : ‘डॉ. बाबासाहेब आंबेडकर मराठवाडा विद्यापीठ प्रशासनाने संशोधक विद्यार्थ्यांसाठी घेतलेला बायोमेट्रिक हजेरीचा निर्णय रद्द करा,’ अशी मागणी करून सम्यक विद्यार्थी आंदोलन संघटनेतर्फे विद्यापीठात निदर्शने करण्यात आली. विविध मागण्यांसाठी प्र-कुलगुरू डॉ. श्याम शिरसाट यांची संघटनेच्या पदाधिकाऱ्यांनी भेट घेतली. पीएचडी संशोधक विद्यार्थ्यांवर लादलेला बायोमेट्रिक हजेरीचा निर्णय रद्द करण्यात यावा, पेट २०२१ ची प्रलंबित प्रकरणे निकाली काढावी, शैक्षणिक वर्ष २०२२ ची पेट लवकरात काढावी, पदवी परीक्षेच्या दरम्यान झालेल्या गोंधळामुळे ज्या विद्यार्थ्यांना पेपर देता आलेला नाही, त्यांची पुन्हा परीक्षा घ्यावी अशा विविध मागण्यांचे निवेदन देण्यात आले. या वेळी प्रदेश महासचिव प्रा. प्रकाश इंगळे यांच्यासह विविध पदाधिकारी उपस्थिती होती.

वर्ष उलटूनही पीएचडी प्रवेश नाही; १५ जानेवारीपर्यंत प्रक्रिया पूर्ण करण्याचे आदेश