MajhiNews Marathi News, Latest Marathi News, Marathi News Paper, Maharashtra Breaking News | मराठी ताज्या बातम्या
एमबीएच्या प्रथम वर्षाला प्रवेश घेतलेल्या काही विद्यार्थ्यांकडे गुणपत्रिका नसल्याने, तंत्रशिक्षण संचालनालयाने (डीटीने) कागदपत्रांच्या पडताळणीत त्रुटी उपस्थित केली आहे. संबंधित विद्यार्थ्यांना गुणपत्रिका वेळेत न मिळाल्यास, त्यांचा प्रवेश रद्दही होण्याची भीती आहे. त्यामुळे या विद्यार्थ्यांना सावित्रीबाई फुले पुणे विद्यापीठाने तातडीने गुणपत्रिका उपलब्ध करून देण्याची मागणी केली जात आहे. दरम्यान, सर्व परीक्षांच्या गुणपत्रिका छापून दिल्या आहेत, असे स्पष्टीकरण विद्यापीठाने दिले आहे.
करोनाच्या प्रादुर्भावामुळे पुणे विद्यापीठाचे शैक्षणिक वेळापत्रक सुरळीत होण्यासाठी अजून काही कालावधी लागण्याची शक्यता आहे. त्यामुळे विद्यापीठाच्या उन्हाळी सत्र परीक्षा उशिराने झाल्या. या परीक्षा उशिरा झाल्या असल्या, तरी परीक्षा व मूल्यमापन मंडळाकडून विविध पारंपरिक पदवी अभ्यासक्रमांच्या अंतिम वर्षांच्या परीक्षांचा निकाल कमी कालावधीत जाहीर केला.
या निकालाच्या आधारावर अनेक विद्यार्थ्यांनी एमबीएच्या अभ्यासक्रमाला प्रवेश घेतला. या वेळी विद्यार्थ्यांना गुणपत्रिका मिळायच्या असल्याने, त्यांनी इतर शैक्षणिक कागदपत्रे आणि दाखल्यांच्या आधारे प्रवेश मिळवला. विद्यापीठाकडून गुणपत्रिका उपलब्ध झाली, की प्रवेश प्रक्रियेच्या दरम्यान महाविद्यालयात देता येईल, असे विद्यार्थ्यांना वाटले. विद्यार्थ्यांना ऑनलाइन गुणपत्रिकेद्वारे प्रवेश देण्याबाबत विद्यापीठाच्या सूचना असल्याने, महाविद्यालयांनीही विद्यार्थ्यांना प्रवेश दिला.
SPPU:’क’ दर्जा मिळवणाऱ्या विभागाकडून मागविले स्पष्टीकरण, सावित्रीबाई फुले पुणे विद्यापीठाचा निर्णय
दरम्यान विद्यार्थ्यांचे प्रथम वर्षांचे शैक्षणिक वर्ग सुरू झाले. मात्र, त्यांना गुणपत्रिका मिळाल्या नाहीत. प्रवेश प्रक्रियेच्या नियमानुसार काही दिवसांनी प्रवेशित विद्यार्थ्यांच्या कागदपत्रांची पडताळणी करण्यासाठी आणि प्रवेशांना मान्यता मिळण्यासाठी ही कागदपत्रे ‘डीटीई’च्या कार्यालयात पाठविण्यात आली. मात्र, या कागदपत्रांमध्ये गुणपत्रिकाच नसल्याने, त्याबाबतची विचारणा ‘डीटीई’ने महाविद्यालयांना केली आहे.
एमबीए अभ्यासक्रमाच्या प्रथम वर्षाला यंदाच्या शैक्षणिक वर्षाला प्रवेश घेतलेल्या विद्यार्थ्यांच्या कागदपत्रांची पडताळणी करण्यात आली. या प्रक्रियेत गुणपत्रिका नव्हत्या. त्यामुळे संबंधित महाविद्यालयांना त्या तातडीने देण्याबाबत सूचना करण्यात आल्या आहेत.
– डॉ. दत्तात्रय जाधव, सहसंचालक, ‘डीटीई’, पुणे
पुणे विद्यापीठाच्या सर्व परीक्षांचे निकाल कमी कालावधीत काही दिवसांपूर्वी प्रसिद्ध झाले आहेत. त्यानंतर विद्यार्थ्यांना गुणपत्रिका उपलब्ध होण्यासाठीची प्रक्रियाही पूर्ण केली आहे. त्यामुळे विद्यार्थ्यांना गुणपत्रिका मिळाल्या नाहीत, असे म्हणणे योग्य ठरणार नाही.
– डॉ. महेश काकडे, संचालक, परीक्षा व मूल्यमापन मंडळ
मराठीतून इंजिनीअरिंग अभ्यासक्रमाचा ग्रामीण भागातील विद्यार्थ्यांना होतोय फायदा
