कोरोनाचे सावट असताना नवीन वर्षाचे सेलिब्रेशन करा, पण विशेष काळजी घेणे गरजेचे

नव्या वर्षात काय घ्यावी काळजी

एकीकडे थंडी वाढत असताना दुसरीकडे चीनमध्ये कोरोना रूग्ण वाढत असल्याचं समोर येत आहे. त्यामुळे नागरिकांनी खबरदारी घेणं गरजेचं आहे.

• ३१ डिसेंबर जवळ येत असल्याने अनेक लोक सुट्ट्यांची योजना आखतात. अशावेळी गर्दीच्या ठिकाणी जाताना मास्कचा वापर करावा
• याशिवाय ज्यांनी बुस्टर डोस घेतलेला नसेल त्यांनी तो लगेचच घ्यावा
• हात न धुता तोंड, नाक, डोळे, कान यांना स्पर्श करू नका
• सहलीला जाताना सोबत वयस्कर व्यक्ती आणि लहान मुले असल्यास शाल व गरम कपडे घ्या
• ताप, अंगदुखी, खोकला, डोकेदुखी, पोटासंबंधी समस्या यासारख्या आजारांवरील औषधं सोबत बाळगा
• विशेषत: तुम्ही लहान मुलांसोबत प्रवास करत असाल तर काही आवश्यक औषधे सोबत ठेवा
• लहान मुलांना दुसऱ्या ठिकाणी गेल्यावर सर्दी आणि फ्लू होतो. हे टाळण्यासाठी आवश्यक औषधे सोबत ठेवण्याचा सल्ला गोरेगावच्या एसआरव्ही रुग्णालयाचे फिजिशियन कन्सल्टंट डॉ. अजित शेट्टी यांनी दिला आहे.

दीर्घकालीन आजार असणाऱ्यांनी घ्या काळजी

ताप, खोकला, श्वास घ्यायला त्रास होणे ही लक्षणे दिसत असतील किंवा मधुमेहासारखे दीर्घकालीन आजार असल्यास किंवा याआधी न्युमोनियासारख्या आजारांची बाधा झाल्यामुळे फुप्फुसाला त्रास झाला होता तर या व्यक्तींनी प्रवास करण्यापूर्वी करोनाची चाचणी करून घेणे महत्त्वाचे आहे. ही चाचणी अधिकृत प्रयोगशाळांमध्ये करावी. ख्रिसमस आणि नवीन वर्षाच्या पार्श्वभूमीवर अनेकजण सेलिब्रेशनच्या मूडमध्ये आहेत. पार्टी करताना रेस्टॉरंट, क्लब अशा गर्दीच्या ठिकाणी शक्यतो जाणे टाळावे. सेलिब्रेशन करताना आपण आपला जीव धोक्यात तर घालत नाही ना याची काळजी घेणे गरजेचे असल्याचे डॉ. पेंडसे यांनी सांगितले.

(वाचा – Omicron Symptom: जगभरात कहर माजवलेल्या ओमिक्रॉन BF.7 चं मुख्य लक्षण Hyposmia, नाकात होते वाढ, कसे ओळखावे संकेत)

बाहेर गर्दीच्या ठिकाणी जाताना अशी घ्या काळजी

• बाहेर पाणी उपलब्ध नसेल हात धुण्यासाठी तर किमान ६० टक्के अल्कोहोल असणारे सॅनिटायझर तुम्ही वापरा
• आपण स्वतः आजारी असाल तर गर्दीच्या ठिकाणी अजिबात जाऊ नका
• तसंच कोणीही अन्य व्यक्ती आजारी असेल तर किमान १ मीटरपर्यंत त्यांच्या संपर्कात येऊ नका
• खोकला अथवा सर्दी असेल तर रूमाल वा टिश्यूचा वापर करा. तसंच वापरल्यावर लगेच कचऱ्याच्या पेटीत टाका. स्वतःजवळ बाळगून ठेऊ नका
• सतत हात लागत असलेल्या वस्तू सॅनिटाईज करा आणि स्वच्छता बाळगण्याचा प्रयत्न करा
• डॉक्टरांनी दिलेली औषधे चुकवू नका. तसंच आपल्या मनाने कोणतेही औषध घेऊ नका. श्वसनक्रियेवर व्यवस्थित लक्ष ठेव. बाहेरगावी त्वरीत डॉक्टर मिळेलच असं नाही. त्यामुळे आपल्या डॉक्टरांनी दिलेली औषधे व्यवस्थित जवळ ठेवा आणि घेण्यास टंगळमंगळ करू नका

कोरोनाचे सावट पुन्हा दिसून येऊ लागले आहे. त्यामुळे आता वेळीच काळजी घेणे आवश्यक आहे. पुन्हा या आजाराने डोकं वर काढायला सुरूवात केली असली तरीही हा आजार वेळीच थोपवणे आवश्यक आहे. लस घेऊन झाली असेल आणि बुस्टर डोस राहिला असेल तर तोदेखील वेळेवर घेऊन तुम्ही पूर्ण करा आणि काळजी बाळगून त्याप्रमाणे नवीन वर्ष साजरे करा. नव्या वर्षात कोरोनाने आजारी पडणार नाही याची पुरेपूर काळजी घ्या.

(फोटो क्रेडिटः Freepik.com)