मासिक पाळीत गुणकारी ठरतात मेथीचे दाणे, आरोग्यासाठी ५ अफलातून फायदे

लोहाची कमतरता दूर करण्यासाठी

मेथीचे दाणे हे शरीरातील रक्ताची कमतरता दूर करण्यासाठी फायद्याचे ठरतात. यामधील आढळणारे लोह हे रक्त वाढविण्यास मदत करते. ज्या महिलांना गर्भावस्था आणि स्तनपानादरम्यान लोहाची कमतरता भासते, त्यांच्यासाठी मेथीचे दाणे वरदान ठरतात. गर्भावस्थेपेक्षाही बाळंतपणानंतर मेथीच्या दाण्यांचा वापर अधिक करण्यात येतो. लोहाची कमतरता रक्त अधिक वाहून गेल्यामुळे अधिक भासते. त्यामुळेच बाळंतपणाच्या वेळी मेथीचे लाडूही खायला देण्यात येतात. शरीरातील रक्ताची आणि लोहाची कमतरता भरून काढण्यासाठी या मेथी दाण्याचा खूपच चांगला उपयोग होतो.

रक्तातील साखर नियंत्रणात आणण्यासाठी

मधुमेह असणाऱ्या व्यक्तींना रक्तातील साखर नियंत्रणात ठेवणे अत्यंत गरजेचे आहे. मेथी दाण्यात फायबर असते, जे रक्तातील साखरेची पातळी खाली आणण्याचे आणि संतुलित राखण्याचे काम करते. त्यामुळे अनेकदा मधुमेही व्यक्तींना सकाळी रिकाम्या पोटी मेथीचे पाणी पिण्याचा सल्ला देण्यात येतो. रात्रभर पाण्यात मेथीचे दाणे भिजवून ठेवावे आणि हे पाणी सकाळी उठल्यावर रिकाम्या पोटी प्यावे. ज्यामुळे रक्तातील साखरेची पातळी नियंत्रणात राहण्यास मदत मिळते. मात्र हा उपाय करताना आपल्या डॉक्टरांचा सल्ला विचारात घ्यावा. तुमचा मधुमेह नक्की किती लेव्हलला आहे, त्यानुसार मेथीचे पाणी नियमित प्यावे.

मासिक पाळीत उपयोगी

मेथीच्या दाण्यामध्ये अँटी-इन्फ्लेमेटरी गुण असतात. जे मासिक पाळीत होणाऱ्या त्रासाला कमी करण्यासाठी उपयुक्त ठरतात. मासिक पाळीमध्ये प्रत्येक महिलेच्या पोटात दुखत असतं. अशी एकही महिला वा मुलगी नसेल जिच्या पोटात दुखत नसेल. अशा परिस्थितीत मेथीचे दाणे उपयोगी ठरतात. मेथीच्या दाण्याचे पाणी प्यायल्यास हे दुखणं बऱ्यापैकी कमी होतं. त्यामुळे मासिक पाळीच्या दिवसात योग्य प्रमाणात हे पाणी प्यावं.

सांधेदुखीपासून सुटका

मेथीच्या दाण्यामध्ये लोह, फॉस्फोरस, कॅल्शियमचे अधिक प्रमाण असते. हाडं मजबूत बनविण्यासाठी याचा उपयोग होतो. या लहानलहान बियांमध्ये असणारे अँटी-इन्फ्लेमेटरी गुण सांधेदुखी अथवा गुडघ्यात येणारी सूज कमी करण्यास मदत करतात. तज्ज्ञांनुसार, रात्री एक चमचा मेथी दाणे पाण्यात भिजवा आणि सकाळी उठल्यानंतर हे मेथीचे दाणे तुम्ही चावून खा. सांधेदुखीपासून लवकर आराम मिळायला याचा उपयोग होईल.

बद्धकोष्ठतेच्या समस्येवर गुणकारी

मेथीच्या दाण्यांमध्ये जास्त प्रमाणात फायबर असते, जे बद्धकोष्ठतेच्या समस्येपासून सुटका मिळवून देण्यास मदत करते. तसंच पोटात होणारी जळजळही यामुळे कमी होते. तज्ज्ञांच्या सल्ल्यानुसार, बद्धकोष्ठतेच्या त्रासातून सुटका मिळविण्यासाठी रात्री झोपण्यापूर्वी कोमट पाण्यात मेथी दाण्यापासून बनविण्यात आलेली मेथी पावडर मिक्स करा आणि ते पाणी प्या. सकाळी संडासला जाताना कोणताही त्रास होणार नाही. तसंच बद्धकोष्ठतेची समस्या लवकरच निघून जाण्यास मदत मिळेल.

विशेष सूचना – वर देण्यात आलेले सर्व उपाय हे तज्ज्ञांच्या सल्ल्यानुसार आहेत. तरीही याचा उपयोग करताना तुम्ही तुमच्या डॉक्टरांचा सल्ला नक्की घ्यावा. कोणत्याही पदार्थाची अलर्जी असल्यास, असाच वापर करू नये.

(फोटो क्रेडिटः Freepik.com)