येत्या काही दिवसांत युक्रेनियन महाविद्यालयांनी या विद्यार्थ्यांना पदवी प्रदान केली तरीही त्यांना भारतात नॅशनल एक्झिट टेस्ट (नेक्स्ट) द्यावी लागेल. जी पुढील वर्षापासून सर्वांसाठी अनिवार्य असणार आहे. परदेशात शिक्षण घेतल्यानंतर भारतात येणाऱ्या विद्यार्थ्यांसाठी येथील स्क्रीनिंग टेस्ट हे नेहमीच मोठे आव्हान राहिले आहे. अशा परिस्थितीत केंद्र सरकारने या विद्यार्थ्यांच्या भवितव्याबाबत लवकरात लवकर निर्णय घेण्याची मागणीही केली जात आहे.
हे विद्यार्थी आणि त्यांच्या कुटुंबीयांना थोडा दिलासा मिळावा म्हणून प्रोग्रेसिव्ह मेडिकोज अँड सायंटिस्ट्स फोरमचे सरचिटणीस डॉ. सिद्धार्थ तारा यांनी पंतप्रधान नरेंद्र मोदी यांना पत्र लिहीले आहे. याप्रकरणी तातडीने निर्णय घेण्याची मागणी त्यांनी पंतप्रधानांकडे केली आहे.
मंगळवारी एमबीबीएसच्या अंतिम वर्षाचा विद्यार्थी नवीन कुमार हा खार्किवमध्ये झालेल्या हल्ल्यात ठार झाला होता. युक्रेनमध्ये २२ हजारांहून अधिक विद्यार्थी असून त्यापैकी साधारण सात ते आठ हजार विद्यार्थी एमबीबीएसच्या अंतिम वर्षाचे असल्याचे त्यांनी सांगितले.
बँकेचे कर्ज घेऊन तेथे प्रवेश घेतलेल्या विद्यार्थ्यांसाठी ही सर्वात वाईट परिस्थिती असल्याचे डॉ.तारा सांगतात. कारण मुलांचा अभ्यास संपण्यापूर्वी त्यांना माघारी यावे लागत आहे. त्यामुळे भविष्यात काय होणार? हे कोणालाच माहीत नाही, पण भारत सरकारने त्यांचा तातडीने विचार करायला हवा असे डॉ. तारा सांगतात.
परदेशाचा पर्याय
जेव्हा एखाद्या विद्यार्थ्याला भारतातील सरकारी वैद्यकीय महाविद्यालयांमध्ये प्रवेश मिळू शकत नाही तेव्हा तो परदेशाचा पर्याय निवडतो. कारण भारतातील खासगी वैद्यकीय महाविद्यालयांच्या तुलनेत बाहेरून एमबीबीएस करणे कमी खर्चिक आहे. आता हे विद्यार्थी परत येत असून यांना सरकारी संस्थेतून एक संधी दिली जाईल का? कारण खासगी महाविद्यालयात प्रवेश मिळाला तरी प्रत्येकाच्या कुटुंबाला हा खर्च उचलणे शक्य होणार नाही असेही ते म्हणाले.
भारताचा शिक्षणावर जास्त खर्च
फेडरेशन ऑफ ऑल इंडिया मेडिकल असोसिएशन (फेमा) चे सदस्य डॉ. राकेश बागरी म्हणतात की, भारतातील कोणत्याही खासगी वैद्यकीय महाविद्यालयात एमबीबीएस पूर्ण करण्यासाठी एक कोटी रुपयांपेक्षा जास्त खर्च येतो. तर युक्रेनमधील कोणत्याही वैद्यकीय महाविद्यालयात हाच अभ्यासक्रम २७ ते २८ लाख रुपयांमध्ये उपलब्ध आहे. युक्रेनमध्ये राहणे देखील फार महाग नाही. जर देशाची राजधानी दिल्लीशी युक्रेनची तुलना केली तर खार्किव किंवा कीव सारख्या शहरांचे राहणीमान जवळपास सारखेच आहे.