परिचारिका अभ्यासक्रमाच्या प्रथम वर्षाच्या प्रवेशाचा मार्ग अखेर मोकळा

परिचारिका अभ्यासक्रमाच्या प्रवेशासाठी नीट परीक्षेत ५० पर्संन्टाइल गुण मिळविण्याची अट यावर्षीपासून सीईटी सेलने घातली होती. देशपातळीवरील बहुतांश राज्यात असे बंधन नसताना महाराष्ट्रातच ही अट का, असा प्रश्न उपस्थित करत काही परिचारिका कॉलेजांच्या संघटनेने न्यायालयाचे दरवाजे ठोठावले होते. यावर, मुंबई उच्च न्यायालयाच्या औरंगाबाद खंडपीठाने परिचारिका अभ्यासक्रमाच्या प्रवेशासाठी ‘नीट’ परीक्षा रद्द करण्याचा निकाल २४ नोव्हेंबरला दिला होता.

त्याचवेळी न्यायालयाने ‘नीट’मधील गुणांआधारे पहिल्या फेरीत झालेले १,२३६ प्रवेश संरक्षित केले होते. तसेच पुढील प्रवेश प्रक्रीया भौतिकशास्त्र, जीवशास्त्र आणि रसायनशास्त्र या विषयांतील गुणांच्या आधारे राबवावी, असा आदेश दिला होता. या निकालाला सीईटी सेल सर्वोच्च न्यायालयात आव्हान दिले होते. सर्वोच्च न्यायालयाने सीईटी सेलची याचिका फेटाळून लावली.

मात्र अद्याप सविस्तर आदेशाची प्रत सर्वोच्च न्यायालयाच्या वेबसाइटवर टाकण्यात आलेली नाही. तसेच न्यायालयाने प्रवेशप्रक्रिया १५ फेब्रुवारीपर्यंत पूर्ण करण्यास सांगितले आहे. त्यामुळे त्यानंतरच परिचारिका अभ्यासक्रमाची महाविद्यालये सुरू होण्याची चिन्हे आहेत.

‘सरकारी अधिकाऱ्यांच्या चुकीच्या धोरणामुळे राज्यातील मुली परिचारिका प्रवेशापासून वंचित राहत आहेत. त्यातून परराज्यातील मुली परिचारिका म्हणून राज्यात कामाला येत आहेत. विद्यार्थ्यांच्या गेल्यावर्षी मार्चमध्ये बारावीच्या परीक्षा झाल्या आहेत. जवळपास नऊ महिन्यांपासून त्या घरी आहेत. आता फेब्रुवारीमध्येच कॉलेज सुरू होणार असल्याने विद्यार्थ्यांचे एक वर्ष वाया गेले आहे. सरकारने यापुढे विद्यार्थ्यांविरोधातील निर्णय न घेता योग्य धोरण आखावे ही माफक अपेक्षा आहे’, अशी भूमिका महाराष्ट्र राज्य खासगी नर्सिंग स्कूल अँड कॉलेज मॅनेजमेंट असोसिएशनचे अध्यक्ष डॉ. बाळासाहेब पवार यांनी मांडली आहे.