Weight Loss साठी करण्यात येणारे इंटरमिटेंट फास्टिंग कोणी करू नये, महत्त्वाची माहिती

गरोदर महिलांनी टाळावे इंटरमिटेंट फास्टिंग

गरोदरपणात अधिकाधिक पौष्टिक पदार्थ खाण्याची गरज असते. इंटरमिटेंट फास्टिंगमध्ये पौष्टिक पदार्थच खातात. मात्र संध्याकाळी ७ नंतर कोणताही पदार्थ खाल्ला जात नाही. गरोदर असताना असे फास्टिंग करून चालत नाही. आपल्यासह पोटात अजून एक जीव वाढत असतो. त्यामुळे त्याचा अधिक विचार करावा लागतो. गर्भवती महिला आणि स्तनपान करणाऱ्या महिलांना या फास्टिंगचा विचारही करू नये. बाळंतपणानंतर साधारण ८-९ महिन्यांनी तुम्ही हा पर्याय नक्की निवडू शकता.

मधुमेही व्यक्तींनी

मधुमेह असणाऱ्या व्यक्तींना साधारण २ तासाने योग्य प्रमाणात काही ना काही खावे लागते. रक्तातील साखरेची पातळी नियंत्रणात ठेवण्यासाठी हे नियम पाळावे लागतात. मधुमेही व्यक्तींना इंटरमिटेंट फास्टिंग करायचेच असेल तर त्यांच्या डॉक्टरांचा योग्य सल्ला घेऊनच त्यांनी याचा पर्याय निवडावा. स्वतःच्या मनाने मात्र त्यांनी या मार्गाकडे जाऊ नये. तसंच मधुमेही व्यक्तींच्या डायबिटीसची पातळी नक्की किती आहे याची तपासणी करूनच वजन कमी करण्यासाठी या मार्गाचा अवलंब करावा.

वाईट प्रतिकारशक्ती असणाऱ्या वक्ती

बदलत्या लाइफस्टाइलमुळे अनेकांची प्रतिकारशक्ती कमी झाली आहे. त्यात गेल्या दोन वर्षात कोरोना नावाची महामारी संपूर्ण जगावर पसरली असल्याने प्रतिकारशक्तीची कमतरता अधिक जाणवत आहे. ज्या व्यक्ती वरचेवर आजारी पडतात त्यांच्यामध्ये कमी प्रतिकारशक्ती असते. त्यामुळे चुकीच्या डाएटचे फॅड डोक्यात घेऊ नका. इंटरमिटेंट फास्टिंग करण्याचा विचार करत असाल तर त्याआधी डॉक्टरांचा सल्ला घ्या. सर्वांसाठी हे फास्टिंग योग्य ठरत नाही.

पचनशक्ती योग्य नसणाऱ्या व्यक्ती

ज्या व्यक्तींची पचनक्रिया योग्य नाही त्यांनी इंटरमिटेंट फास्टिंगचा पर्याय न निवडणे योग्य आहे. यामध्ये अधिक काळ उपाशी राहावे लागते आणि एकाच वेळी खाणे खावे लागते. मात्र ज्या व्यक्तींना गॅस, अॅसिडिटी, बद्धकोष्ठता समस्या असे त्रास आहेत आणि त्यामुळे पचनशक्ती योग्य राहात नाही अशा व्यक्तींनी इंटरमिटेंट फास्टिंग करणे टाळावे.

अनिद्रा समस्या असणाऱ्यांनी

ज्यांना झोपेची समस्या आहे अथवा अनिद्रेचा त्रास आहे त्यांनीही हा फास्टिंगचा पर्याय टाळावा. या इंटरमिटेंट फास्टिंगमुळे तुमच्या झोपेचा पॅटर्न बदलू शकतो आणि तुम्हाला स्लीप डिसऑर्डर नावाचा आजारही उद्भवू शकतो. त्यामुळे ज्यांना झोपेचा त्रास आहे आणि सतत विचार करण्याची सवय आहे अशा व्यक्तींनी इंटरमिटेंट फास्टिंगचा पर्याय अजिबात वापरू नये. वजन कमी करण्यासाठी अन्य पर्यायांचा वापर करावा.

हा लेख सामान्य माहितीसाठी देण्यात आला आहे. तुम्ही जर इंटरमिटेंट फास्टिंगचा पर्याय वजन कमी करण्यासाठी निवडणार असाल तर स्वतःच्या मनाने हे करण्यापेक्षा तुमच्या डॉक्टरांचा सल्ला घ्या आणि नंतरच यावर काम करा. वजन कमी करण्यासाठी चालणे अथवा सामान्य व्यायामाचा आधार घेतल्यास, अधिक चांगला पर्याय ठरू शकतो. वर देण्यात आलेल्या माहितीनुसार तुम्हाला असे आजार असतील तर शक्यतो इंटरमिटेंट फास्टिंग करणे टाळा.

(फोटो क्रेडिटः Freepik.com)

अशाच अधिक लाइफस्टाइल, हेल्थ, फॅशन, ब्युटी, होम डेकोर, रिलेशनशिप, हॅक्स यावरील अधिक माहितीसाठी क्लिक करा maharashtratime.com