रेखाकला परीक्षेच्या शुल्काबाबत प्रश्नचिन्ह

म. टा. विशेष प्रतिनिधी, मुंबई

महाराष्ट्र राज्य कलाध्यापक संघ आणि राज्यातील कलाशिक्षकांनी विरोध केल्यानंतर उच्च व तंत्रशिक्षणमंत्री उदय सामंत यांनी ऑनलाइन घेण्यात येणारी सरकारी इंटरमिजिएट परीक्षा पुढे ढकलत ऑफलाइन घेण्याचा निर्णय घेतला. त्यामुळे विद्यार्थी, पालक व शिक्षकांनी समाधान व्यक्त केले. मात्र नोंदणी केलेल्या ११ हजार विद्यार्थ्यांना आपले शुल्क किती आणि कसे मिळणार, असा प्रश्न पडला आहे.

महाराष्ट्र राज्य कला संचालनालयाने २२ व २३ फेब्रुवारीला ऑनलाइन पद्धतीने इंटरमिजिएट परीक्षा घेण्याचे जाहीर केले होते. या परीक्षेसाठी २०० रुपये शुल्क आकारले होते. परंतु परीक्षा ऑनलाइन पद्धतीने घेण्यास राज्यातील कलाशिक्षक, महाराष्ट्र राज्य कलाध्यापक संघ महामंडळ व शिक्षक भारतीकडून विरोध करण्यात आला होता. इंटरमिजिएट परीक्षा ही ऑनलाइन घेणे शक्य नाही. ही परीक्षा ऑफलाइनच घेण्यात यावी, तसेच वाढीव शुल्क रद्द करण्याची मागणी करण्यात आली होती. यासंदर्भात महाराष्ट्र राज्य कलाध्यापक संघ महामंडळाने महाराष्ट्र विधानसभा अध्यक्ष श्रीहरी झिरवाळे यांची भेट घेतली. त्यांनी तातडीने केलेल्या कारवाईमुळे उदय सामंत यांनी तातडीची बैठक घेत परीक्षा ऑफलाइन घेण्याचा तसेच नोंदणी केलेल्या ११ हजार विद्यार्थ्यांचे शुल्क परत देण्याचे आदेश दिले. त्यामुळे विद्यार्थी, पालक व शिक्षकांनी आनंद व्यक्त केला. मात्र आपण भरलेले २२० रुपये शुल्कापैकी किती आणि कसे शुल्क मिळणार, असा प्रश्न विद्यार्थ्यांना पडला आहे.

महाराष्ट्र राज्य कलाध्यापक संघ महामंडळाने याबाबत पाठपुरावा केला असता विद्यार्थ्यांना लवकरच शुल्क परत करण्यात येईल, असे महाराष्ट्र राज्य कला संचालनालयाकडून सांगण्यात आले. तसेच भरलेल्या शुल्कातून जीएसटी व काही शुल्क वगळून उर्वरित रक्कम विद्यार्थ्यांना परत केली जाईल. ही रक्कम विद्यार्थ्यांनी ज्या बँक खात्यातून शुल्क भरले आहे, त्या खात्यामध्ये ऑनलाइन माध्यमातून वळती करण्यात येणात असल्याचे संचालनालयाकडून स्पष्ट करण्यात आल्याचे महाराष्ट्र राज्य कलाध्यापक संघ महामंडळाच्या उपनगर जिल्ह्याचे अध्यक्ष प्रकाशचंद्र मिश्रा यांनी सांगितले.

इंटरमिजिएट, एलिमेंटरी ड्रॉईंग परीक्षा आता ऑनलाइनऐवजी ऑफलाइन

बोर्ड परीक्षांंसंबंधी याचिकेवर सुनावणीस सर्वोच्च न्यायालय सहमत