MPSC: ‘सी-सॅट’ गुण केवळ पात्रतेसाठी ग्राह्य धरण्याबाबतचा अहवाल प्रलंबितच

केंद्रीय लोकसेवा आयोगाच्या (UPSC) परीक्षांमध्ये ‘सी-सॅट’ विषय केवळ पात्रतेसाठीच ग्राह्य धरला जातो. मात्र, ‘एमपीएससी’ने ‘सी-सॅट’ विषय अनिवार्य केला असून, त्याचे गुण अंतिम निकालासाठी ग्राह्य धरण्यात येतात. याला राज्यभरातील उमेदवारांकडून विरोध करण्यात येत आहे. विविध संघटनांनीही ‘यूपीएससी’च्या धर्तीवर ‘सी-सॅट’ विषयाचे गुण केवळ पात्रतेसाठी ग्राह्य धरण्याची मागणी केली आहे. मात्र, ‘एमपीएससी’ने त्या संदर्भात निर्णय घेतला नाही. याबाबत उमेदवारांनी आक्रमक भूमिका घेतल्यावर राज्य सरकारने ऑक्टोबरमध्ये तज्ज्ञ समिती नियुक्त करण्याचा निर्णय घेतला. शिफारशींचा अहवाल सादर करण्यासाठी समितीला एक महिन्याची मुदत देण्यात आली होती. आता मार्च महिना संपायला आला तरीही समितीने अहवाल सादर केला नसल्याची बाब स्पष्ट झाली आहे. समितीने दिलेली वेळ का पाळली नाही, समितीकडून होत असलेल्या विलंबाचा परिणाम पुढील निर्णयांवर होणार असूनही ‘एमपीएससी’कडून समितीकडे पाठपुरावा का केला जात नाही, असे उमेदवारांचे म्हणणे आहे.

”सी-सॅट’ पात्रतेसाठीच ग्राह्य धरण्याचा निर्णय होत नसल्याने, विशेषतः ग्रामीण भागातील शेकडो उमेदवारांचे नुकसान होत आहे. ‘एमपीएससी’ने तातडीने कार्यवाही करून बऱ्याच वर्षांपासून रखडलेला हा प्रश्न मार्गी लावून उमेदवारांना दिलासा द्यायला हवा. ‘यूपीएससी’च्या कार्यपद्धतीनुसार काम केले जात असल्याचे ‘एमपीएससी’कडून वारंवार सांगितले जाते. मात्र, ‘सी-सॅट’च्या बाबत एवढी दिरंगाई कशासाठी, हा प्रश्न आहे. गेल्या पाच वर्षांपासून याबाबत पाठपुरावा करूनही त्याकडे लक्ष दिले जात नाही,’ असे एमपीएससी स्टुडंट राइट्सचे महेश बडे यांनी सांगितले.

‘एमपीएससी’ला गांभीर्य नाही का?

राज्य सरकारने ऑक्टोबरमध्ये समिती नियुक्त केली होती. पाच महिने उलटून गेल्यानंतरही अहवाल सादरच केलेला नाही. हा विषय केवळ पात्रतेसाठी ग्राह्य धरण्यात येत नसल्याने, शहरी आणि ग्रामीण भागात पारंपरिक पदवी अभ्यासक्रमांचे शिक्षण घेऊन, राज्य सेवा परीक्षा देणाऱ्या उमेदवारांचे नुकसान होत आहे. याउलट व्यावसायिक अभ्यासक्रमांचे शिक्षण पूर्ण करणाऱ्या उमेदवारांना फायदा होत आहे. अशा परिस्थितीत पदभरती परीक्षेत सर्वांना समान संधी उपलब्ध होण्यासाठी ‘सी-सॅट’ विषय केवळ पात्रतेसाठी धरण्याची आवश्यकता आहे. मात्र, समितीचा अहवाल प्रलंबित असल्याने, उमेदवारांच्या मागणीचे ‘एमपीएससी’ला गांभीर्य नाही का, असा प्रश्न उपस्थित करण्यात येत आहे.

MPSC राज्य सेवा पूर्वपरीक्षेची उत्तरतालिका जाहीर, ‘येथे’ करा डाउनलोड

Indian Army मध्ये एनसीसी कॅडेट्ससाठी विशेष प्रवेश