तिसऱ्या टी-२० सामन्यासाठी मैदानात पाऊल ठेवताच रोहितनं मोठा विक्रम आपल्या नावावर केला.
भारतीय क्रिकेट संघाचा नवा कर्णधार रोहित शर्माने आज रविवारी (२७ फेब्रुवारी) श्रीलंकेविरुद्धच्या तिसऱ्या टी-२० सामन्यात इतिहास रचला आहे. धर्मशाला येथील रोहितचा हा १२५वा आंतरराष्ट्रीय टी-२० सामना आहे. तो जगातील सर्वाधिक आंतरराष्ट्रीय टी-२० सामने खेळणारा खेळाडू ठरला आहे. त्याने या बाबतीत पाकिस्तानचा दिग्गज खेळाडू शोएब मलिकचा विक्रम मोडला. मलिकच्या नावावर १२४ टी-२० सामन्यांची नोंद आहे.
सर्वाधिक टी-२० सामने खेळणाऱ्या खेळाडूंच्या यादीत पहिल्या तीनमध्ये पाकिस्तानचे दोन खेळाडू आहेत. मलिकनंतर त्याचा सहकारी मोहम्मद हाफिज तिसऱ्या क्रमांकावर आहे. हाफिजने ११९ सामन्यांमध्ये पाकिस्तानचे प्रतिनिधित्व केले आहे. त्याच्यापाठोपाठ इंग्लंडचा इऑन मॉर्गन आणि बांगलादेशचा महमुदुल्ला यांचा क्रमांक लागतो. मॉर्गनने ११५ तर महमुदुल्लाहने ११३ सामने खेळले आहेत. रोहितनंतर माजी कर्णधार महेंद्रसिंह धोनीचा क्रमांक लागतो. धोनीने ९८ सामने खेळले आहेत.
हेही वाचा – ‘‘रोहितशी हात मिळवताना सावधगिरी बाळगा, कारण…”, वाचा असं का म्हणाला मोहम्मद कैफ!
तिसऱ्या टी-२० सामन्यात रोहित शर्माने नाणेफेक गमावली. श्रीलंकेने प्रथम फलंदाजी करण्याचा निर्णय घेतला. या सामन्यात इशान किशन, जसप्रीत बुमराह, भुवनेश्वर कुमार, आणि यजुर्वेंद्र चहल यांना विश्रांती देण्यात आली आहे. ”१२५व्यांदा देशाचे प्रतिनिधित्व करताना चांगले वाटत आहे. मला अजून बरीच वर्षे खेळायचे आहे”, असे रोहितने टॉसदरम्यान म्हटले.