HSC Exam 2022: दहावी, बारावी परीक्षेच्या उत्तरपत्रिकांचे गठ्ठे पडूनच

विनाअनुदानित शिक्षकांनी अनुदानाच्या मागणीसाठी विविध टप्प्यात आंदोलन केले. दहावी, बारावीच्या उत्तरपत्रिका तपासणीवर बहिष्कार टाकल्याचे सांगण्यात आले. औरंगाबाद विभागातील अनेक शाळा, महाविद्यालयांमध्ये उत्तरपत्रिका तपासणीची प्रक्रियेला गती आलेली नाही. विनाअनुदानित शाळांमधील अनेक शिक्षक उत्तरपत्रिका तपासणीसाठी सहकार्य करत नसल्याचे सांगण्यात येते. त्यामुळे अनेक गठ्ठे तसेच पडून आहेत. विनाअनुदानित शाळा कृती समिती, समन्वय संघ आदींनी उत्तरपत्रिका तपासणीवर बहिष्कार असेल, असे मंडळाला कळविल्याचे सूत्रांनी सांगितले. अनेक शिक्षक उत्तरपत्रिका तपासणी प्रक्रियेत सहभागी होत नसल्याने उत्तरपत्रिकांची तपासणीची प्रक्रिया केव्हा पूर्ण होणार, निकाल लांबणार का, असे प्रश्न उपस्थित होत आहेत. त्याचवेळी मंडळाने यापूर्वीच स्पष्ट करत उत्तरपत्रिकांचे गठ्ठे परत पाठविल्यास संबंधित शाळा, महाविद्यालयांवर कारवाईचा इशारा दिला होता. यामुळे गठ्ठे परत न पाठवता संबंधित शाळा, महाविद्यालयांमध्येच ठेवत काही शिक्षकांनी तपासणीकडे पाठ फिरवली आहे.

औरंगाबाद विभागात एक लाख ६९ हजार २८९ विद्यार्थी बारावीची परीक्षा देत आहेत. बारावी परीक्षेसाठी औरंगाबाद विभागात ४०८ मुख्य केंद्र तर ८५५ उपकेंद्रांवर परीक्षा होत आहे. दहावीची परीक्षा विभागातून एक लाख ८५ हजार ४३४ विद्यार्थी देत आहेत. विभागातील दोन हजार ४४७ शाळांमधून हे विद्यार्थी परीक्षा देत आहेत. उत्तरपत्रिकांची संख्या तीस ते पत्तीस लाखांच्या आसपास असते, असे मंडळातील सूत्रांनी सांगितले.

उत्तरपत्रिकांचे गठ्ठे तपासणीविना मंडळाकडे परत आलेले नाहीत. याबाबत मुख्याध्यापक, प्राचार्यांना स्पष्ट सूचना देण्यात आल्या. गठ्ठे परत पाठविणाऱ्या संस्थावर मंडळ योग्य ती कारवाई करेल.
– आर. पी. पाटील, विभागीय सचिव,
माध्यमिक व उच्च माध्यमिक शिक्षण मंडळ, औरंगाबाद

राज्यातील सुमारे सहा हजार विनाअनुदानित शाळेतील शिक्षकांना शंभर टक्के पगार देण्याचे व सेवा संरक्षण देण्याचे दिलेले आश्वासन राज्य सरकारने अद्यापही पाळलेले नाही. कायम विनाअनुदानित शाळा कृती समितीच्या आव्हानाला प्रतिसाद देत, या शाळेतील कार्यरत शिक्षकांनी यंदा दहावी व बारावी पेपर तपासणीवर बहिष्कार घातला आहे. यामुळे निकालावर प्रचंड मोठा फरक पडणार आहे. निकाल उशीरा लागल्यास त्यासाठी सरकारच जबाबदार असेल.

– रवींद्र तम्मेवार, राज्य प्रसिद्धीप्रमुख
महाराष्ट्र राज्य कायम विनाअनुदानित शाळा कृती समिती

गोदामातील परीक्षा रडारवर; कॉलेजची मान्यता रद्दची प्रक्रिया सुरू

ऊन वाढले मात्र नगरमधील शाळांच्या वेळेचा पेच कायम!