‘मेटा’पाठोपाठ आता ‘ॲमेझॉन’ही जवळपास १०,००० कर्मचाऱ्यांची कपात करण्याच्या तयारीत आहे. ‘न्यूयॉर्क टाइम्स’च्या वृत्तानुसार, कंपनी पुढील आठवड्यात हा निर्णय घेण्याची शक्यता आहे. गेल्या काही तिमाहींमध्ये कंपनीला मोठा तोटा झाल्याने हा निर्णय घेण्यात आला आहे.
आर्थिक मंदीत मोठ्या प्रमाणावर वाढ होत असून, अशा परिस्थितीत खर्च कमी करण्याची गरज असल्याचे कंपनीचे मत आहे. ‘ॲमेझॉन’ने गेल्या आठवड्यापासून नोकरभरती बंद केल्याची घोषणा केली होती. त्याशिवाय सध्याच्या कर्मचाऱ्यांना अन्य ठिकाणी नोकरी शोधण्याविषयीही सांगण्यात आले आहे. ‘ॲमेझॉन’कडे ३१ डिसेंबर २०२१पर्यंत सुमारे १६ लाख पूर्णवेळ आणि अर्धवेळ कर्मचारी आहेत. कंपनीने एकाच वेळी १०,००० कर्मचाऱ्यांना काढून टाकले, तर ही आजवरच्या इतिहासातील सर्वांत मोठी कपात ठरणार आहे.
‘वाढत्या महागाईमुळे लोकांचे बजेट कोलमडले असून, खरेदीसाठी प्रमाण खूपच कमी झाले आहे. सध्या ग्राहक उच्च महागाई आणि खर्चाचा ताळमेळ साधण्याचा प्रयत्न करीत आहेत,’ अशी माहिती कंपनीचे मुख्य वित्तीय अधिकारी ब्रायन ओल्साव्हस्की यांनी दिली.
‘मेटा’कडूनही कपातीवर भर
‘फेसबुक’ची पालक कंपनी असलेल्या ‘मेटा’ने ११ हजार कर्मचाऱ्यांना कामावरून कमी करीत असल्याची घोषणा नुकतीच केली. आतापर्यंतची ही सर्वांत मोठी नोकरकपात आहे. ‘मेटा’मधील कर्मचाऱ्यांची सप्टेंबर अखेरपर्यंतची संख्या ८७ हजार होती. सर्व तंत्रज्ञान कंपन्या नोकरकपात करीत असताना ‘मेटा’नेही तोच पर्याय स्वीकारला आहे. नोकरकपातीचा अर्थ काय आहे हे लवकरच कर्मचाऱ्यांना मेलद्वारे कळविले जाईल, असे सांगण्यात आले.
माणसांऐवजी रोबोंना संधी
‘ॲमेझॉन’च्या अनेक विभागांमध्ये माणसांऐवजी रोबोंना संधी देण्यात येत आहे. कंपनीतर्फे पाठविण्यात येणाऱ्या तीन चतुर्थांश डिलिव्हरी रोबोंच्या माध्यमातून होत आहे. ‘ॲमेझॉन रोबोटिक्स’चे प्रमुख टाय ब्रॅडी यांनी दिलेल्या माहितीनुसार, येत्या पाच वर्षांमध्ये पॅकिंगसाठी रोबोंची मदत घेण्यात येणार आहे. माणसाची जागा रोबो घेणार असले, तरी त्यासाठी खूप कालावधी लागणार असल्याचेही त्यांनी स्पष्ट केले. ब्रॅडी यांच्या मते कंपनीतील कामाची पद्धत बदलली तरी, काही कामांसाठी माणसांचीच गरज भासणार आहे.