विशीतील तरुणांनाही हृदयाच्या समस्या येऊ लागल्या आहेत. खालील लेखात आम्ही तुम्हाला हृदय निरोगी कसे ठेवायचे ते सांगत आहोत. यासाठी आम्ही डॉ. बिपीनचंद्र भामरे, मुंबईतील सर एच.एन. रिलायन्स फाउंडेशन हॉस्पिटल आणि रिसर्च सेंटरचे सल्लागार कार्डियाक सर्जन यांच्याशी चर्चा केली. (फोटो सौजन्य – iStock)
चुकीची जीवनशैली महत्त्वाचे कारण
वयाच्या 20 व्या वर्षापासून तुम्हाला तुमच्या हृदयाच्या आरोग्याची काळजी घेणे हे तुमचे प्राधान्य असले पाहिजे. स्पर्धा परीक्षेमुळे वाढणारा तणाव तसेच या तणावामुळे आहार-विहाराच्या चुकीच्या सवयी निर्माण होऊ शकतात. एकाच जागी बराच वेळ बसणे, व्यायाम न करणे आणि अनियमित आणि अपुरी झोप, खाण्यापिण्याच्या चुकीच्या सवयी यामुळेही हृदयावर परिणाम होऊ शकतो.
मिठाचे मर्यादित सेवन करा
उच्च रक्तदाबामुळे तुमच्या हृदयावर परिणाम होऊ शकतो हे प्रत्येकालाच माहीत असते . त्यामुळे आहारात मिठाचे सेवन मर्यादित करून रक्तदाब नियंत्रित करणे गरजेचे राहील. दररोज किंवा डॉक्टरांनी सांगितल्याप्रमाणे रक्तदाब नियंत्रित करण्याचा प्रयत्न करा.
(वाचा – Weight Loss: काकडी खाण्याने वजन कमी होते का? उन्हाळ्यात असा करा काकडीचा उपयोग)
रक्तातील साखर आणि कोलेस्ट्रॉलवर नियंत्रण ठेवा
रक्तदाबासोबतच तुम्हाला तुमच्या रक्तातील साखर आणि कोलेस्टेरॉलची पातळीही नियंत्रणात ठेवण्याची गरज आहे. यामुळे तुम्हाला हृदयाच्या समस्येपासून दूर राहण्यास मदत होईल. आजकाल वयाच्या कोणत्याही टप्प्यात हे आजार होऊ शकतात याची जाणीव ठेवा.
(वाचा – Health Tips: रोज सकाळी प्याल धणे पाणी तर थायरॉईडसह अनेक आजारांवर करू शकाल मात)
संतुलित आहाराचे सेवन करा
सर्व महत्त्वाच्या पोषक घटकांचा समावेश असलेला आहार घेणे उत्तम राहिल. निरोगी खाण्याच्या पद्धतींचे पालन करा. ताजी फळे, हिरव्या पालेभाज्या, कडधान्ये, मसूर, काजू आणि तेलबियांची निवड करा. पुरेसे प्रथिने खाण्याचा प्रयत्न करा आणि आवश्यक असल्यास तज्ज्ञांची मदत घ्या. ते तुम्हाला काय खावे आणि काय टाळावे याविषयी मार्गदर्शन करतील.
(वाचा – PCOS समस्येतून बाहेर यायचे असेल तर हे पदार्थ खावे, आयुर्वेदातील नियम ठरतील फायदेशीर)
वजन नियंत्रणात ठेवा
जंक फूड, मसालेदार, तेलकट, हवाबंद डब्यातील आणि प्रक्रिया केलेले पदार्थांचे सेवन टाळा. लठ्ठपणा हा सर्व रोगांची आमंत्रण देतो आणि हृदयाच्या समस्यांना बळी पडू शकतो. योग्य वजन राखणे गरजेचे आहे.
धुम्रपान टाळा
धुम्रपान केवळ फुफ्फुसांनाच नाही तर हृदयासही हानिकारक ठरते. हे हृदयविकाराच्या प्रमुख घटकांपैकी एक आहे. धूम्रपानामुळे रक्तवाहिन्या घट्ट होतात आणि संकुचित होतात, ज्यामुळे प्लेक तयार होतात आणि हृदयविकाराचा झटका आणि स्ट्रोकची शक्यता वाढते.
कौटुंबिक इतिहास जाणून घ्या
कौटुंबिक इतिहास जाणून नियमित हृदय तपासणीसाठी जा: जर तुमच्या कुटुंबातील कोणाला हृदयाची समस्या असेल तर तुम्ही देखील वेळोवेळी तपासणी करुन घेणे आवश्यक आहे. तज्ज्ञांनी सांगितल्यानुसार दर ६ महिन्यांनी किंवा वर्षानंतर नियमित हृदय तपासणी करणे आवश्यक आहे. असे केल्याने तुम्ही तुमच्या हृदयाच्या आरोग्यावर नियंत्रण ठेवू शकता.
टीप – हा लेख केवळ सामान्य माहितीसाठी असून यामधून कोणत्याही प्रकारच्या उपचाराचा दावा केला गेलेला नाही. अधिक जास्त माहितीसाठी नेहमी आपल्या डॉक्टरांचा सल्ला घ्या आणि त्यांच्या सल्ल्यानुसारच योग्य ते बदल करा