दहावीच्या सराव परीक्षेला सुरुवात

दहावीच्या मुख्य परीक्षेत निकालाची टक्केवारी वाढविण्यासाठी गणेश नाईक चॅरिटेबल ट्रस्टतर्फे शालांत परीक्षा मंडळाच्या धर्तीवर ही सराव परीक्षा आयोजित केली जाते. याचा शुभारंभ येत्या ३ डिसेंबर रोजी दुपारी दीड वाजता नेरुळमधील तेरणा मेडिकल डेंटल कॉलेजच्या सभागृहात केला जाणार आहे. या उपक्रमाची सुरुवात, आजवर झालेली प्रगती आणि भविष्यातील योजनांविषयी संदीप नाईक यांनी प्रसारमाध्यमांशी संवाद साधला. यावेळी या उपक्रमाचे मुख्य समन्वयक अनंत सुतार, प्राचार्य प्रताप महाडिक, ज्येष्ठ शिक्षक नरेंद्र म्हात्रे हे मान्यवर उपस्थित होते.

आतापर्यंत दीड लाख विद्यार्थ्यांनी या सराव परीक्षेचा लाभ घेऊन मुख्य परीक्षेत यश संपादन केले आहे. यावर्षी ३ ते १८ डिसेंबर या कालावधीमध्ये सराव परीक्षा पार पडणार आहे. यावर्षी ९,७०० विद्यार्थ्यांनी परीक्षेसाठी नावनोंदणी केली आहे. यावर्षी विद्यार्थ्यांच्या संख्येत, परीक्षा केंद्रांच्या संख्येत वाढ झाली आहे. नवी मुंबईतील सर्वच विभागातून ७२ शाळांचा यावर्षी सहभाग असणार आहे. नवी मुंबईतील सराव परीक्षा मराठी, हिंदी आणि इंग्रजी या तीनही भाषा माध्यमांतून घेतली जाते. एसएससी बोर्डप्रमाणे हॉलतिकीट, परीक्षा केंद्रे, प्रश्नपत्रिका तयार करणे आणि त्या तपासणे अशी सर्व कामे तज्ज्ञ शिक्षकांमार्फत केली जातात.

Pariksha Pe Charcha 2023: पंतप्रधान मोदींना प्रश्न विचारा, ‘येथे’ करा नोंदणी
एसएससी सराव परीक्षेमध्ये गुणवत्ता यादीत येणारे विद्यार्थी मुख्य परीक्षेत गुणवत्ता यादीमध्ये झळकतात. मुख्य परीक्षेच्या आधी विद्यार्थ्यांना विषयानुरूप, आपण कुठे कमी पडत आहोत, उत्तरांमधील उणीवा काय आहेत हे समजते. त्यामध्ये विद्यार्थी सुधारणा करतात. अधिक आत्मविश्वासाने मुख्य परीक्षेला सामोरे जाऊन यश संपादित करतात.

गणेश नाईक चॅरिटेबल ट्रस्टच्या वतीने यावर्षी देखील विद्यार्थ्यांना विनामूल्य शैक्षणिक ॲप भेट देण्यात येणार आहे. या ॲपमध्ये हजारो प्रश्नपत्रिका असून त्या प्रश्नपत्रिका सोडविण्याचा सराव विद्यार्थ्यांना करता येईल.
– संदीप नाईक, सचिव ( श्री गणेश नाईक चॅरिटेबल ट्रस्ट)

पोलीस उपनिरीक्षक पदांसाठीच्या शारीरिक चाचणीनंतर चारच तासात निवड यादी