मंत्रीमंडळाच्या पहिल्याच बैठकीत पंजाबच्या मुख्यमंत्र्यांचा मोठा निर्णय; सरकार देणार २५००० नोकऱ्या | Big decision in the first cabinet meeting the government will give 25000 government jobs abn 97

पंजाबमधील सत्तेची सूत्रे हाती घेताच मुख्यमंत्री भगवंत मान यांनी शुक्रवारी बेरोजगारी दूर करण्यासाठी मोठा निर्णय घेतला. पंजाबचे मुख्यमंत्री भगवंत मान यांनी शनिवारी मुख्यमंत्री झाल्यानंतर पहिली मंत्रिमंडळ बैठक घेतली. पंजाब सरकारच्या मंत्र्यांनीही आज सकाळी मंत्रीपदाची शपथ घेतली आहे. पहिल्या कॅबिनेट बैठकीत भगवंत मान यांनी सरकारी नोकऱ्यांबाबत काही महत्त्वाचे आणि मोठे निर्णय घेतले आहेत. पंजाब मंत्रिमंडळाने शनिवारी पंजाब पोलीस विभागात १०,०० आणि इतर सरकारी विभागांमधील १५,००० रिक्त पदांसह एकूण २५,००० सरकारी नोकऱ्या प्रदान करण्याचा ठराव मंजूर केला.

पंजाबमध्ये नवे सरकार स्थापन झाल्यानंतर शनिवारी भगवंत मान मंत्रिमंडळाची पहिली बैठक झाली. या बैठकीत राज्यातील बेरोजगारी दूर करण्यासाठी पहिले पाऊल उचलण्यात आले. पंजाब मंत्रिमंडळाच्या बैठकीपूर्वी मंत्र्यांना शपथ देण्यात आली. मुख्यमंत्री भगवंत मान यांच्या नेतृत्वाखालील मंत्रिमंडळात एका महिलेसह आम आदमी पक्षाच्या (आप) दहा आमदारांचा समावेश करण्यात आला आहे.

पंजाब सरकार पंजाबमधील महामंडळ आणि सरकारी कार्यालयांमधील रिक्त पदेही भरणार आहे. भगवंत मान मंत्रिमंडळानेही व्होट ऑन अकाउंट आणण्याचा निर्णय घेतला आहे. तर सरकारचा संपूर्ण अर्थसंकल्प जून महिन्यात सादर केला जाईल. पंजाब निवडणुकीदरम्यान आम आदमी पक्षाने तरुणांना रोजगार देण्याचे आश्वासन दिले होते. पहिल्या कॅबिनेट बैठकीत २५,००० रिक्त पदे भरण्याचा निर्णय हा आम आदमी पक्षाचा जाहीरनामा पूर्ण करण्यासाठी मान सरकारचे पहिले पाऊल आहे.