“मी भगवी वस्त्रे घालत असल्याचा मला अभिमान”; कपड्याच्या रंगावरून टीका करणाऱ्या सपाला योगींचे प्रत्युत्तर

भगव्या रंगावरून उत्तर प्रदेशचे राजकारणात तापले आहे. समाजवादी पक्षाचे प्रमुख अखिलेश यादव यांच्या पत्नी डिंपल यादव यांनी मुख्यमंत्री योगी आदित्यनाथ यांच्यावर हल्लाबोल करताना, योगी आदित्यनाथ गंजाच्या रंगासारखे कपडे घालतात असे म्हटले होते. लोखंडाला गंज लागल्यावर त्याचा रंग काय असतो? ते म्हणाले होते की, इंजिन लोखंडाचे असते, पण आमचे मुख्यमंत्री त्याच रंगाचे कपडे घालतात, असे वक्तव्य डिंपल यादव यांनी केले होते. त्यावर गोरखपूरमध्ये मुख्यमंत्री योगी आदित्यनाथ यांनी प्रत्युत्तर देत होय, मी भगवाधारी असल्याचे सांगत याचा मला अभिमान आहे, असे म्हटले आहे.

डिंपल यादव यांच्यावर उपरोधिक टीका करताना, मुख्यमंत्री योगी आदित्यनाथ यांनी म्हटले की, लोखंडाच्या गंजाचा रंग भगव्या वस्त्राशी जोडणारे त्यांचे वक्तव्य म्हणजे सनातन संस्कृती, सृजन आणि संत परंपरेचा अपमान आहे. भाजपाच्या दुहेरी इंजिन सरकारला गंज चढला आहे आणि योगी आदित्यनाथ गंजाच्या रंगासारखे कपडे घालतात, असे डिंपल यादव म्हणाल्या होत्या.

“त्यांचे वक्तव्य म्हणजे सनातन संस्कृती, सृजन आणि संत परंपरेचा अपमान आहे. तसेच मी भगवी वस्त्रे घालत असल्याचा मला अभिमान आहे,” असे योगी आदित्यनाथ यांनी आपल्या सभेत म्हटले. यानंतर बराच वेळ जाहीर सभेत ‘मी भगवाधारी’, ‘आम्हीही भगवेधारी’ अशा घोषणा देण्यात येत होत्या.