‘आधार’ नसेल तर विद्यार्थ्यांना प्रवेश द्यायचा नाही का?

आधार नोंदणीबाबत येत असलेल्या अडचणींचा उल्लेख करून मुख्याध्यापक महामंडळाने राज्याचे शिक्षण आयुक्त सूरज मांढरे यांना एक पत्र लिहिले असून, त्यामध्ये आयुक्तांनी शाळांमध्ये आधार नोंदणीबाबत सुरू असलेली वस्तुस्थिती समजून घेण्याचे आवाहन केले आहे. राज्यातील मुख्याध्यापकांच्या मते आधार नोंदणीबाबत पालकांकडून शाळांना सहकार्य मिळत नाही, काही विद्यार्थ्यांचे बायोमेट्रीक पूर्ण होऊनही आधारची यंत्रणा ते स्वीकारत नाही, अनेक विद्यार्थ्यांना आधार नोंदणी करूनही आधार क्रमांक मिळालेले नाहीत, आधार नोंदणीबाबत महसूल आणि शिक्षण विभागाने कोणतीही तांत्रिक मदत देऊ केलेली नाही, शाळांमधील शिक्षक, मुख्याध्यापक यांनी नोंदणी, दुरुस्ती करून ‘स्टुडंट पोर्टल’ला माहिती भरली तरी ती ‘अपडेट’ केली जात नाही. या सगळ्या कारणांसाठी मुख्याध्यापकांना जबाबदार का धरायचे, असा प्रश्न निवेदनात उपस्थित करण्यात आला आहे.

राज्यातील १९ लाख विद्यार्थ्यांकडे आधारकार्ड नाही, शिक्षण विभागाच्या मोहिमेतून माहिती समोर

शिक्षण विभागाने शाळांना भेडसावणाऱ्या या समस्यांचे निराकरण करावे; अन्यथा आधार नोंदणी नसलेल्याच विद्यार्थ्यांना शाळांमध्ये प्रवेश देण्याची परवानगी द्यावी, अशी मागणी मुख्याध्यापक महामंडळाने केली आहे. आधार असलेल्याच विद्यार्थ्यांना प्रवेश द्या, असे स्पष्ट आदेश शिक्षण विभागाने काढावेत, म्हणजे ‘आधार’चा तिढा सुटेल, असे मुख्याध्यापकांकडून सांगण्यात येत आहे.

शिक्षण विभाग, महसूल विभागाकडून आधार नोंदणीबाबत तांत्रिक मदत मिळणे अपेक्षित आहे. विद्यार्थ्यांची नोंदणी, अपडेट करण्याची प्रक्रिया शाळांमध्येच उपलब्ध करून देणे गरजेचे आहे. जेणेकरून ती प्रक्रिया पूर्ण करणे सोपे जाईल. पालकांकडून या नोंदणीबाबत कोणतेही सहकार्य मिळत नसल्याचे स्पष्ट झाले आहे. प्रक्रिया पूर्ण व्हायला दिवस जात असल्याने पालक येत नाहीत. शिक्षण विभागाला ही वस्तुस्थिती कळावी, यासाठी त्यांना निवेदन दिले आहे.
– महेंद्र गणपुले, प्रवक्ता, मुख्याध्यापक महामंडळ