सावित्रीबाई फुले पुणे विद्यापीठासह राज्यातील १४ आकृषी विद्यापीठे व शासनमान्य अभिमत विद्यापीठांना सहायक प्राध्यापक मिळणार आहेत. या विद्यापीठांमधील रिक्त असलेल्या प्राध्यापकांच्या पदांपैकी ८० टक्के म्हणजेच ६५९ पदांच्या भरतीला राज्य सरकारने मान्यता दिली असून, लवकरच ही पदे भरली जाणार आहेत.
राज्यातील १५ आकृषी विद्यापीठांमध्ये आणि सरकारमान्य अभिमत विद्यापीठांत गेल्या अनेक वर्षांपासून सहायक प्राध्यापकांच्या शेकडो जागा रिक्त आहेत. सावित्रीबाई फुले पुणे विद्यापीठात २५०हून अधिक प्राध्यापकांच्या जागा रिक्त आहेत. या प्राध्यापकांची भरती केली जावी; म्हणून राज्यातील सर्व विद्यापीठांकडून सातत्याने मागणी होत आहे. मात्र, राज्यातील सर्व सरकारी विद्यापीठांच्या रिक्त जागांचा आकृतिबंध अद्याप पूर्ण झालेला नाही. यामुळे एकूण रिक्त पदांच्या ८० टक्के जागा भरण्याचा निर्णय सरकारने घेतला असून, ६५९ पदांना मंजुरी देण्यात आली आहे. यातील काही पदे सावित्रीबाई फुले पुणे विद्यापीठ, गोखले इन्स्टिट्यूट यांच्यासह काही शासनमान्य विद्यापीठांच्या वाट्याला येणार आहेत.
या पदांच्या मंजुरी संदर्भात ऑक्टोबरमध्ये झालेल्या बैठकीत उपसमितीने ६५९ पदांच्या भरतीस मान्यता दिली होती. बुधवारी याबाबत राज्य सरकारकडून आदेश जाहीर करण्यात आला असून, त्यात पदांना मंजुरी देण्याची घोषणा करण्यात आली आहे. २०१९च्या शासन निर्णयातील अटींनुसार भरती पूर्ण करण्याबाबतही सूचना देण्यात आल्या आहेत.
प्रति विद्यापीठ २५च प्राध्यापक
सरकारकडून सहायक प्राध्यापकांची भरती केली जाणार असली, तरी मंजूर झालेल्या पदांची संख्या अजूनही कमी आहे. ६५९ पदे १५ सरकारी विद्यापीठे आणि इतर शासनमान्य अभिमत विद्यापीठांना वाटून मिळणार असल्याने प्रत्येक विद्यापीठाच्या वाट्याला २० ते २५ प्राध्यापकच येण्याची चिन्हे आहेत. यामुळे सरकारने आणखी पदांना मंजुरी द्यावी, अशी मागणी विद्यापीठांकडून केली जात आहे.