मराठीतून इंजिनीअरिंग अभ्यासक्रमाचा ग्रामीण भागातील विद्यार्थ्यांना होतोय फायदा

राष्ट्रीय शैक्षणिक धोरणामध्ये मातृभाषेतून शिक्षणाला महत्त्व देण्यात आले आहे. हाच धागा पुढे नेत, अखिल भारतीय तंत्रशिक्षण परिषदेने (एआयसीटीई) तंत्रशिक्षण अभ्यासक्रमाचे शिक्षण प्रादेशिक भाषांमध्ये उपलब्ध करून देण्यावर भर दिला. त्यानुसार तंत्रशिक्षण संचालनालयाच्या (डीटीई) आवाहनानुसार गेल्या शैक्षणिक वर्षात राज्यात ‘पीसीसीओई’ या स्वायत्त कॉलेजमध्ये कम्प्युटर इंजिनीअरिंग पदवी अभ्यासक्रमाचे शिक्षण विद्यार्थ्यांना मराठीतून देण्याचा प्रयोग प्रायोगिक तत्त्वावर राबविण्यात आला. त्यासाठी गेल्या वर्षी ६७ विद्यार्थ्यांना प्रवेश देण्यात आला.

यातील अनेक विद्यार्थी राज्यातील ग्रामीण भागातील आहेत. काही दिवसांपूर्वी या विद्यार्थ्यांचा निकाल जाहीर झाला असून, उत्तीर्णांचे प्रमाण ८५ टक्के आहे. मराठीतून शिक्षणाचे धडे मिळत असल्याने, ग्रामीण भागातील इंजिनीअरिंगच्या संकल्पना आणि प्रोग्रॅम हे विद्यार्थ्यांना अधिक चांगल्या पद्धतीने समजत असल्याचा निष्कर्ष पुढे आला आहे, असे ‘पीसीसीओई’चे संचालक डॉ. गोविंद कुलकर्णी यांनी सांगितले.

MBBS च्या वर्गात शिकायचा बारावीचा विद्यार्थी, कॉलेजलाही थांगपत्ता नव्हता पण…

यावर दिला भर…

– मराठीतून पुस्तके उपलब्ध करून देणे

– ‘एआयसीटीई’च्या पुस्तकांमुळे विद्यार्थ्यांना शिकण्यासाठी मुबलक पुस्तके उपलब्ध

– वर्गात मराठी आणि इंग्रजी अशा दोन्ही भाषेतून शिक्षण देणे

– परीक्षेत उत्तरे लिहिण्यासाठी मराठी आणि इंग्रजी अशा दोन्ही भाषांचे पर्याय

– प्लेसमेंटच्या दृष्टीने अंतिम वर्षापर्यत इंग्रजीसोबतच परदेशी भाषांचे शिक्षण

मराठीतून इंजिनीअरिंगचे शिक्षण देण्याबाबत पालकांनी गेल्या वर्षी विविध प्रश्न उपस्थित केले होते. त्यानंतर त्यांना संपूर्ण कल्पना समजल्यावर, प्रवेशासाठी सकारात्मकता दर्शवली. हे विद्यार्थी चांगल्या गुणांनी प्रथम वर्ष उत्तीर्ण होऊन, आता द्वितीय वर्षात शिक्षण घेत आहेत. ही कल्पना रूजत असल्याने यंदाच्या शैक्षणिक वर्षात फारसे प्रश्न पुढे आले नाहीत. यंदा पूर्ण जागांवर प्रवेश झाले असून, कट ऑफ गुण ९५ टक्के होते. या विद्यार्थ्यांना भविष्यात रोजगाराबाबत काहीही अडचण येऊ नये, यासाठी इंग्रजीसोबतच, जर्मन, जॅपनिजसारख्या परदेशी भाषा शिकवण्यात येत आहे.
– डॉ. संजिवनी सोनार, प्रमुख, प्रथम वर्ष इंजिनीअरिंग विभाग

मराठीतून इंजिनीअरिंगचे कन्सेप्ट अधिक चांगल्या पद्धतीने समजत असल्याचे आमच्या लक्षात आले. त्यामुळे द्वितीय वर्षात मराठी किंवा इंग्रजी हा फरत आता जाणवत नसून, शिकण्यासाठी मराठीचा फायदा होत आहे. समजण्यासाठीचा क्लिष्ट भाग मराठीतून चांगल्या पद्धतीने समजत आहे. उत्तरे मराठी किंवा इंग्रजीतून लिहिण्याची मुभा असल्याने, त्याचाही फायदा होत आहे.
– अनुराग कोकीळ, विद्यार्थी, द्वितीय वर्ष, ‘पीसीसीओई’

महाराष्ट्र – कर्नाटक सीमा भागामध्ये मराठी कॉलेज प्रलंबितच