पुण्यातील कल्याणनगर परिसरात मद्यधुंद अवस्थेतील एका अल्पवयीन आरोपीनं पोर्शे कारने दोघांना चिरडल्याने तरुण-तरुणीचा जागीच मृत्यू झाला. पुण्यातील हिट अँड रन प्रकरणी विविध खुलासे होताना दिसत आहेत. कल्याणीनगर अपघात प्रकरणातील अल्पवयीन आरोपीचा ब्लड रिपोर्ट बदलल्याप्रकरणी ससून रुग्णालयातील दोन डॉक्टरांना अटक करण्यात आली आहे. आता या प्रकरणी पोलीस आयुक्तांनी सविस्तर घटनाक्रम सांगितला आहे.
पुणे पोलीस आयुक्त अमितेश कुमार यांनी पत्रकार परिषद घेतली. यावेळी त्यांनी पुणे कल्याणीनगर अपघात प्रकरणी झालेल्या चौकशीची माहिती सांगितली. यावेळी ते म्हणाले, या अपघात प्रकरणी 120 B, 467, 201, 213 आणि 213 या कलमान्वये गुन्हा दाखल करण्यात आला आहे. पुण्यातील ससून डॉक्टरांवर गुन्ह्याच्या कटात सहभागी होणे, बनावट कागदपत्रे तयार करणे, पुरावा नष्ट करणे या कलमाखाली अटक करण्यात आली आहे. त्या दोन्हीही डॉक्टरांना पोलिसांनी पहाटे अटक केली आहे.
पुणे पोलिसांनी दिलेल्या माहितीनुसार, ससून रुग्णालयातील डॉ. अजय तावरे आणि डॉ. श्रीहरी हळनोर यांनी त्या अल्पवयीन मुलाला वाचवण्यासाठी रक्ताचे घेतलेले नमुने कचरा पेटीत टाकले. यानंतर त्यांनी दुसऱ्याच व्यक्तीचे नमुने फॉरेन्सिक लॅबला पाठवले. डॉ. अजय तावरे यांच्या सांगण्यावरुन डॉ. श्रीहरी हळनोर यांनी हे रक्ताचे नमुने बदलले. पहिल्या सॅम्पलमध्ये अग्रवालच्या अल्पवयीन मुलाचा रिपोर्ट निगेटिव्ह आला होता. त्यामुळे पोलिसांचा संशय बळावला. यानंतर पोलिसांनी दुसऱ्यांदा ब्लड सॅम्पल घेत औंधमधील सरकारी रुग्णालयात दिले होते.
यावेळी औंध रुग्णालयात वडील आणि मुलगा दोघांचे नमुने पाठवण्यात आले होते. त्या ठिकाणी विशाल अग्रवाल आणि त्याच्या पोराचे सॅम्पल मॅच झाले. पण ससूनमधील रक्ताचा अहवाल मॅच झाला नाही. त्यानंतर पुणे पोलिसांनी डॉ. श्रीहरी आणि अजय तावरेला अटक केली आहे. त्या दोघांना आज न्यायालयात हजर केलं जाणार आहे. याप्रकरणी हा चौथा गुन्हा दाखल करण्यात आला आहे.
पुणे पोलीस आयुक्त अमितेश कुमार यांनी दिलेल्या माहितीनुसार विशाल अग्रवालच्या फोनवर डॉक्टर अजय तावरेचा कॉल होता. ससून रुग्णालयातील पहिलाच रिपोर्ट पुणे आरोपीने नशा न केल्याचा आल्याने या प्रकरणांमध्ये संशय बळावला होता. त्यामुळे पोलिसांनी अल्पवयीन आरोपीचे रक्ताचे नमुने पुन्हा एकदा घेत ते खबरदारीचा उपाय म्हणून औंधमधील सरकार रुग्णालयामध्ये दिले होते. पोलिसांच्या तपासामध्ये श्रीहरीने हे कृत्य डॉ. अजय तावरेच्या सांगण्यावरून केल्याचं समोर आलं आहे. त्यामुळे त्याने रक्ताचे नमुने बदलले होते. यामुळे ब्लड रिपोर्ट फेरफार प्रकरणात विशाल अग्रवालला अटक होण्याची शक्यता आहे.