सत्यजित तांबे हे व्यवस्थापन आणि राज्यशास्त्रात पदव्युत्तर पदवीधर आहेत. अमेरिकेतील हार्वर्ड विद्यापीठाच्या जॉन एफ केनेडी स्कूलमध्येही त्यांनी शिक्षण घेतले. वयाच्या अवघ्या २४ व्या वर्षी त्यांनी जिल्हा परिषद निवडणूक जिंकली आणि जिल्हा परिषद निवडणूक जिंकणारे सर्वात तरुण सदस्य ठरले.
२०१७ पर्यंत ते जिल्हा परिषद सदस्य राहिले. २०१८ मध्ये, सत्यजित यांनी महाराष्ट्र प्रदेश युवक काँग्रेसच्या अध्यक्षपदासाठी निवडणूक जिंकली. युवक काँग्रेसचे अध्यक्ष या नात्याने त्यांनी गेल्या विधानसभा निवडणुकीसाठी वेगळा ‘युवा जाहीरनामा’ही जारी केला होता.
राजकारणाव्यतिरिक्त शहरी विकास, युवा सक्षमीकरण आणि आंतरराष्ट्रीय राजकारण हे सत्यजित यांचे आवडते विषय आहेत. २०१६ च्या अमेरिकन अध्यक्षीय निवडणुकीत त्यांनी स्वयंसेवक म्हणून काम केले आहे. त्यांना वाचनाची आवड आहे आणि ते स्तंभलेखनही करतात. त्यांनी ‘आंदोलन’ नावाचे पुस्तकही लिहिले आहे, जो भारतातील चळवळी आणि चळवळींच्या संस्कृतीची आणि महत्त्वाची माहिती देणारा ऐतिहासिक दस्तऐवज आहे.
नुकतेच त्यांचे ‘सिटीझनविल’ हे एक पुस्तक प्रकाशित झाले आहे. हे पुस्तक कॅलिफोर्नियाचे लेफ्टनंट गव्हर्नर गॅविन न्यूजम यांच्या पुस्तकाचा मराठी अनुवाद आहे. हे पुस्तक न्यूजमच्या सॅन फ्रान्सिस्कोचे महापौर असतानाच्या अनुभवांवर आधारित आहे. मुळात सुशासन आणि लोकसहभाग हा या पुस्तकाचा विषय आहे. देवेंद्र फडणवीस यांच्या हस्ते या पुस्तकाचे प्रकाशन करण्यात आले. या प्रकाशनादरम्यान सत्यजित यांच्यावर आमचा डोळो असल्याचे सूचक विधान फडणवीसांनी केले होते. त्यामुळे ही बंडखोरी अधिक चर्चेत आली आहे.
सत्यजित यांना यावेळी विधान परिषदेची निवडणूक लढवायची होती. परंतु काँग्रेसने त्यांच्या वडिलांना नाशिक पदवीधर मतदारसंघातून पुन्हा उमेदवारी दिली. सामान्यतः कुटुंबीय काँग्रेस पक्षाच्या आदेशाचे पालन करतात पण यावेळी तांबे कुटुंबीयांनी तसे केले नाही. काँग्रेसची अधिकृत उमेदवारी मिळूनही डॉ.सुधीर यांनी अर्ज भरला नाही. त्यांच्या जागी त्यांचा मुलगा सत्यजित यांनी अपक्ष म्हणून अर्ज दाखल केला. तांबे पिता-पुत्राच्या कारवाईमुळे विधान परिषदेच्या नाशिक पदवीधर मतदारसंघात काँग्रेस आणि महाविकास आघाडीचा एकही उमेदवार रिंगणात राहिला नाही.