फार्मसी डिप्लोमा ‘एस-स्कीम’च्या विद्यार्थ्यांना परीक्षेची केवळ चार संधी

म. टा. प्रतिनिधी, नाशिक

फार्मसी कौन्सिल ऑफ इंडियाने फार्मसी पदविकेच्या अभ्यासक्रमात (Pharmacy Diploma) बदल करीत शैक्षणिक वर्ष २०२१-२२ साठी ‘जे स्कीम’ लागू केली आहे. त्यामुळे यापूर्वीच्या अभ्यासक्रमानुसार म्हणजेच ‘एस-स्कीम’नुसार प्रवेश घेतलेल्या विद्यार्थ्यांना परीक्षेच्या केवळ चार संधी उपलबध करून देण्यात येणार आहेत. पुढील दोन वर्षात त्यांना परीक्षा पास होणे अनिवार्य असल्याचे राज्य तंत्रशिक्षण मंडळामार्फत (एमएसबीटीई) जाहीर करण्यात आले आहे.

फार्मसी पदविकेच्या अभ्यासक्रमामध्ये बदल करीत फार्मसी कौन्सिलने शैक्षणिक वर्ष २०२१-२२ पासून नवीन अभ्यासक्रम लागू केला आहे. या अभ्यासक्रमाला ‘जे स्कीम’ असे संबोधण्यात येते. त्यापूर्वीच्या अभ्यासक्रमाला ‘एस-स्कीम’ असे संबोधण्यात येते. यंदापासून नवीन अभ्यासक्रम लागू झाल्यामुळे जुन्या अभ्यासक्रमातील विद्यार्थ्यांना कौन्सिलच्या सूचनेनुसार नवीन अभ्यासक्रम लागू झाल्यापासून चार परीक्षांची संधी दिली जाणार आहे. या चार संधींमध्ये त्यांना उत्तीर्ण व्हावे लागणार आहे. पदविका पहिल्या वर्षातील विद्यार्थ्यांसाठी उन्हाळी परीक्षा २०२३ पर्यंत ही संधी असणार आहे, तर थेट दुसऱ्या वर्षात प्रवेश घेतलेल्या विद्यार्थ्यांसाठी उन्हाळी परीक्षा २०२४ पर्यंत ही संधी असणार आहे. त्यानंतर या अभ्यासक्रमाच्या विद्यार्थ्यांसाठी कोणतीही परीक्षा घेतली जाणार नसल्याचे ‘एमएसबीटीई’मार्फत स्पष्ट करण्यात आले आहे.

शैक्षणिक वर्ष २०२०-२१ मध्ये जुन्या अभ्यासक्रमानुसार प्रवेश घेतलेल्या, परंतु सत्र पूर्ण न झाल्यामुळे परीक्षेला बसण्यास अपात्र ठरलेल्या तसेच मंडळामार्फत नोंदणी होऊनही परीक्षा अर्ज न भरल्यामुळे परीक्षेस अपात्र ठरलेल्या विद्यार्थ्यांना २०२१-२२ पासून नवीन अभ्यासक्रमाला पुन:प्रवेश घेणे बंधनकारक असणार आहे. या विद्यार्थ्यांना ‘चेंज ऑफ स्कीम’चे प्रमाणपत्रही घ्यावे लागणार आहे. या प्रमाणपत्रानंतरच विद्यार्थ्यांना नवीन अभ्यासक्रमानुसार परीक्षा अर्ज उपलब्ध करून दिला जाणार आहे.

GPAT Exam Pattern 2022: जीपीएटी परीक्षेचा पॅटर्न मार्किंग स्कीम जाणून घ्या

इंजिनीअरिंगच्या विद्यार्थ्यांसाठी पर्यावरणाचा अभ्यास अनिवार्य, AICTE समितीचा निर्णय
मुंबई विद्यापीठ आयडॉलचे जानेवारी सत्राचे प्रवेश सुरू