युक्रेनहून परतलेल्या विद्यार्थ्यांचे अकरा महिन्यांपासून ऑनलाइन शिक्षण

फेब्रुवारीत रशिया-युक्रेनमधील संघर्षाने विघातक स्वरूप धारण केले. युक्रेन येथे शिक्षणासाठी गेलेल्या विद्यार्थ्यांचा जीव धोक्यात आला. त्यामध्ये हजारो भारतीयदेखील होते. भारत सरकारने सर्व विद्यार्थ्यांना सुखरूप परत आणले होते. नागपुरातून एमबीबीएसचे शिक्षण घेण्यासाठी गेलेल्या विद्यार्थ्यांचादेखील त्यामध्ये समावेश आहे. यापैकी काही विद्यार्थ्यांशी ‘मटा’ने संवाद साधला.

विद्यार्थी स्वप्नील वैरागडे याने दिलेल्या माहितीनुसार, ‘माझ्यासह पाचशे विद्यार्थी उझोरड विद्यापीठाचे आहेत. आम्ही सर्व जण परतलो तेव्हा पहिल्या सत्रात होतो. आता आमचे तिसरे सत्र सुरू आहे. मागील दोन्ही सत्रांचा अभ्यास ऑनलाइन पद्धतीने झाला. लेखी परीक्षा ऑनलाइन स्वरूपात होती. बहुपर्यायी प्रश्नांवर आधारित ऑनलाइन प्रश्नसंच आणि व्हायवा तोंडी असायचा. अशा प्रकारे मागील दोन सत्रे पार पडलीत.’

काहींनी घेतला इतरत्र प्रवेश

वैद्यकीय शिक्षण हे प्रत्यक्ष स्वरूपातील आहे. ते पूर्णत: ऑनलाइन स्वरूपात शक्य नाही. या पार्श्वभूमीवी परत आलेल्या काही विद्यार्थ्यांनी इतर देशांमध्ये प्रथम सत्रात नव्याने प्रवेश घेतला. यामध्ये प्रामुख्याने कझाकीस्तान येथील विद्यापीठांचा समावेश आहे.

सावित्रीबाई फुले पुणे विद्यापीठाच्या विद्यार्थ्यांना परीक्षेची प्रतीक्षा

भारतात सामावून घेण्यावर ठाम

युक्रेनमधील परिस्थिती अजुनही पूर्ववत झालेली नाही. तिथे अधूनमधून हल्ले सुरू आहेत. तणावपूर्ण स्थिती कायम आहे. ऑनलाइन शिक्षणातही अडथळे येताहेत. ही स्थिती लक्षात घेत परतलेल्या विद्यार्थ्यांना भारतातील वैद्यकीय महाविद्यालयांमध्ये सामावून घेण्याच्या मागणीवर विद्यार्थी-पालक ठाम आहेत. यासंदर्भात विद्यार्थी आणि पालकांनी न्यायालयात धाव घेतली आहे. उच्च न्यायालयात त्यांची याचिका प्रलंबित असून अद्याप यासंदर्भात कुठलाही निर्णय आलेला नाही.