ऑनलाइन परीक्षा ही विद्यार्थ्यांसाठी धोक्याची घंटा: उदय सामंत

म. टा. प्रतिनिधी, पुणे

‘करोनाचा प्रादुर्भाव संपल्यानंतरही ऑनलाइन परीक्षांची मागणी करणे ही विद्यार्थी आणि शिक्षण क्षेत्रासाठी धोक्याची घंटा असून, यापुढे सर्व परीक्षा ऑफलाइन स्वरूपातच व्हायला हव्यात,’ असे सांगत राज्याचे उच्च व तंत्रशिक्षण मंत्री उदय सामंत यांनी महाविद्यालयीन विद्यार्थ्यांकडून उपस्थित केला जाणाऱ्या ऑनलाइन परीक्षांच्या मुद्द्यावर ताशेरे ओढले. ‘विद्यार्थ्यांनी ऑनलाइन परीक्षांच्या मायाजालातून बाहेर पडावे,’ असा सल्लाही त्यांनी दिला.

महर्षी कर्वे स्त्री शिक्षण संस्थेच्या एसएनडीटी महिला विद्यापीठाशी संलग्नित ‘बीसीए’ आणि ‘बी.डिझाइन’ पदवी पूर्ण केलेल्या विद्यार्थिनींना सामंत यांच्या हस्ते पदवी प्रदान करण्यात आली. त्या वेळी ते बोलत होते. कर्वे स्त्री शिक्षण संस्थेचे कार्याध्यक्ष रवींद्र देव, उपकार्याध्यक्ष विद्या कुलकर्णी, व्यवस्थापक मंडळाचे सदस्य, जयंत इनामदार, प्रभाकर सोनपाटकी, दत्‍ताजी थोरात, सचिव डॉ. पी. व्ही. एस. शास्त्री, कॉलेजचे प्राचार्य मंजू हुंडेकर आदी या वेळी उपस्थित होते. या वेळी सायली मोहिते (सातारा), भाग्यश्री दीवाकर, आणि अंजली वैती (पुणे) या विद्यार्थिनींना सुवर्णपदक प्रदान करण्यात आले.

‘करोनानंतर आता ऑफलाइन शिक्षणाची चळवळ उभारणे गरजेचे आहे. त्यासाठी विद्यार्थ्यांनी आणि शिक्षणसंस्थांनी पुढाकार घ्यायला हवा. ऑनलाइन परीक्षांची मागणी ही धोक्याची घंटा आहे. अशा परीक्षांमुळे विद्यार्थ्यांचे नुकसानच होईल,’ असे सामंत यांनी सांगितले. ‘आपल्या मातृभूमीशी कायम नाळ जोडून ठेवा,’ असे सांगताना त्यांनी विद्यार्थ्यांना काही उदाहरणे दिली. ‘जोगेश्‍वरीच्या झोपडपट्टीतील माझा मित्र मंगेश म्हैसकर हा आज अमेरिकेमध्ये महिन्याला एक कोटी २० लाख रुपये पॅकेज घेऊन आयटी कंपनीत काम करतो. पण फेब्रुवारी आणि मार्च महिन्यात सुट्टी घेऊन तो भारतात येतो आणि जोगेश्‍वरीच्या झोपडपट्टीतील विद्यार्थ्यांना स्वत:ची शैक्षणिक प्रगती कशी करावी, याचे मोफत प्रशिक्षण देतो. असाच संकल्प अन्य विद्यार्थ्यांनीदेखील करायला हवा,’ याकडे सामंत यांनी लक्ष वेधले. कार्यक्रमात संस्थेच्या स्कूल ऑफ फॅशन टेक्नॉलॉजी आणि ‘बीसीए’च्या ६५० विद्यार्थिनींना पदवी प्रदान करण्यात आली. कार्यक्रमाचे सूत्रसंचालन मल्लिका सामंत यांनी केले. समीक्षा निकम यांनी आभार मानले.

शाळा संपून चार तास उलटले तरी मुलं घरी आली नाहीत… शाळेची बस हरवली आणि…

इंजिनीअरिंगचे शिक्षण मातृभाषेतून घेण्याला प्रतिसादशैक्षणिक नुकसान कसे भरून काढणार? चीनमधून परतलेल्या विद्यार्थ्यांचा सवाल