राष्ट्रीय शैक्षणिक धोरणाच्या अंमलबाजवणीसाठी विज्ञान अध्यापनासाठी तज्ज्ञ शिक्षक घडवण्यासाठी भारतीय विज्ञान शिक्षण आणि संशोधन संस्था (आयसर पुणे) आणि मुंबईतील टाटा समाजविज्ञान संस्था (टीस) यांनी नुकताच करार केला. या करारांतर्गत शिक्षकांसाठी गणित आणि विज्ञानातील नवे अभ्यासक्रम विकसित करण्यात येणार आहे. या अभ्यासक्रमाद्वारे ‘आयसर पुणे’च्या विद्यार्थ्यांना विज्ञान अध्यापनात मदत होणार आहे.
टाटा समाजविज्ञान संस्थेचे शिक्षक आणि ‘आयसर पुणे’चे विज्ञानातील तज्ज्ञ यांना एकत्र आणून राष्ट्रीय शैक्षणिक धोरणामध्ये भर देण्यात आला आहे. बहुविद्याशाखीय शिक्षण आणि शिक्षकांचे प्रावीण्य साध्य करण्यासाठी प्रयत्न करण्यात येतील. सामंजस्य कराराद्वारे शिक्षकांसाठी गणित आणि विज्ञानातील नवे अभ्यासक्रम तयार केले जातील. त्यामुळे देशातील विज्ञान अध्यापनाची क्षमता आणि गुणवत्ता वाढण्यास मदत होईल.
संयुक्त अभ्यासक्रमाद्वारे विद्यार्थ्यांना निसर्गविज्ञान, विज्ञान शिक्षणातील अध्यापन, संशोधनासाठी साह्य केले जाईल, असे प्रा. उदगावकर यांनी सांगितले. टाटा समाजविज्ञान संस्थेच्या सेंटर ऑफ एक्सलन्स इन टीचर एज्युकेशनच्या माध्यमातून देशभरातील शिक्षकांसाठी काम करण्यात येते. या कराराद्वारे महत्त्वपूर्ण बहुविद्याशाखीय अभ्यासक्रम राबवणे शक्य होणार असून, त्यामुळे विज्ञान शिक्षक आणि अभ्यासकांची नवी पिढी घडवता येईल, असे प्रा. शालिनी भारत यांनी सांगितले.
कराराच्या वेळी ‘आयसर पुणे’चे संचालक डॉ. जयंत उदगावकर, कुलसचिव कर्नल जी. राजा शेखर (निवृत्त) , डॉ. भास बापट, टाटा समाजविज्ञान संस्थेच्या संचालक प्रा. शालिनी भारत, कुलसचिव नरेंद्र मिश्रा, सहायक संचालक प्रा. बिनो पॉल, प्रा. पद्मा सारंगपाणी, उमा लाल आदी उपस्थित होते.