महापालिका शाळांच्या वर्ग खोल्या डिजिटल

महापालिकेकडून डिजिटल वर्गखोल्यांच्या निमित्ताने शिक्षणाचे नवे दालन खुले केले जात असले तरी त्याचा पुरेपूर फायदा विद्यार्थ्यांना घेता येण्याच्या दृष्टीने प्रशासनाकडून प्रयत्न होण्याची गरज ठाणेकरांकडून व्यक्त होत आहे.

ठाण्यातील महापालिका शाळेत शिक्षण घेण्यासाठी २०१८ मध्ये २०० वर्ग डिजिटल करण्याचा निर्णय घेऊन त्यासाठी ७ कोटी ६० लाखांचा खर्च करण्यात आला होता. त्यानंतर ह्या वर्ग खोल्यांचे प्रयोगिक तत्त्वावर लोकार्पणही करण्यात आले होते. खासगी इंग्रजी शाळांसोबत तुलना करण्याच्या दृष्टीने ठाणे महापालिकेकडून करण्यात आलेल्या या प्रयोगाचे कौतुक झाले होते. परंतु त्यानंतर ह्या उपक्रमाची फारशी चर्चा झाली नाही. करोना काळातही ई-लर्निंगच्या दृष्टीनेही या उपक्रमांचा फारसा उपयोग झाल्याचे दिसून आले नाही.

पालिकेच्या सीबीएसई शाळेला मान्यतेची प्रतीक्षा
परंतु, त्यानंतरही ठाणे महापालिकेकडून डिजिटल वर्गखोल्यांच्या माध्यमातून प्रगत शिक्षणाचे प्रयोग सुरू ठेवण्यात येत आहेत. ठाणे महापालिकेच्या डिजिटल शाळांच्या पहिल्या टप्प्यामध्ये १३२ शाळांमध्ये ३२ प्राथमिक आणि १६८ माध्यमिक शाळा डिजिटल करण्याचे निश्चित करण्यात आले होते. दुसऱ्या टप्प्यामध्ये ३३ वर्गांचे डिजिटायझेशनचे काम सुरू करण्यात आल्याचे महापालिकेकडून स्पष्ट करण्यात आले आहे.

ठाणे महापालिकेकडून हाती घेण्यात येणारे उपक्रम चांगले असले तरी त्यांच्या अंमलबजावणीमध्ये अनेक त्रुटी आढळून येत असल्याचा अनुभव सामाजिक कार्यकर्त्यांना येत आहे. त्यामुळे ठाणे महापालिका प्रशासनाने या वर्गखोल्यांच्या उभारणीनंतर त्यांच्या वापराबद्दलही अधिक माहिती नागरिकांपर्यंत पोहचवण्याची गरज ठाणेकरांकडून व्यक्त होत आहे.