मुंबईत करोना संसर्गामुळे शाळा नियमितपणे आणि प्रत्यक्ष सुरू होण्यात वारंवार व्यत्यय येत गेले. अखेरीस करोना नियंत्रणात आल्यानंतर मुंबईतील पालिकेसह अन्य सर्व मंडळाच्या पूर्व प्राथमिक ते बारावीपर्यंत शाळा, ज्युनिअर कॉलेजे मार्चपासून सुरू करण्याचा निर्णय घेण्यात आला आहे. त्यानुसार बुधवारपासून शाळा पूर्ण उपस्थितीनिशी केवळ ऑफलाइन पद्धतीनेच सुरू झाल्या. मित्र-मैत्रिणींची भेट झाल्यामुळे, शिक्षकांशी स्क्रीनवर नव्हे तर प्रत्यक्ष बोलता येत असल्याने विद्यार्थ्यांच्या आनंदालाही पारावार उरला नव्हता. कोणत्या नियमांचे या ऑफलाइन शाळांदरम्यान पालन करायचे आहे, ते जाणून घ्या…
काय आहेत नियम?
– विद्यार्थी शाळेत प्रवेश करताना त्यांचे तापमान तपासले जाईल.
– शिक्षक-शिक्षकेतर कर्मचाऱ्यांची १०० टक्के उपस्थिती आवश्यक.
– शिक्षक- शिक्षकेतर कर्मचाऱ्यांचे १०० टक्के लसीकरण अनिर्वाय.
– करोनापूर्व वेळापत्रकानुसार शाळांच्या नियमित वर्गांच्या तासांमध्ये मैदानी खेळ, शालेय कवायती, सहशालेय शैक्षणिक उपक्रम घेतले जावेत.
– वर्ग, स्कूलबस/स्कूल व्हॅनसह शालेय परिसरात मास्क वापरणे बंधनकारक. परंतु, मैदानी खेळ/कवायतींसाठी मास्क बंधनकारक नाही.
– शाळांमध्ये पूर्वीप्रमाणे मधली सुट्टी देण्यात येणार आहे.
– तसेच मधल्या सुट्टीत विद्यार्थ्यांना पूर्वीप्रमाणे आहार घेण्यास अनुमती.
– करोनासदृश लक्षणे असल्यास मुलांना शाळेत पाठवू नये.
– विद्यार्थ्यांना पूर्वीप्रमाणेच शाळेत ये-जा करण्यासाठी बेस्ट सेवा, खासगी बसच्या प्रवासास अनुमती.