मेडिकल पीजी विद्यार्थ्यांच्या समस्या सोडवण्यासाठी समिती

आरोग्य विद्यापीठाशी संलग्न राज्यभरातील पदव्युत्तर महाविद्यालयांमध्ये सध्या जवळपास साडे चार हजार विद्यार्थी शिक्षण घेत आहेत. पदवी पूर्ण केल्यानंतर हॉस्पिटलशी संलग्न महाविद्यालयांमध्ये हे विद्यार्थी पदव्युत्तर अभ्यासक्रमाला प्रवेश घेतात. प्रात्यक्षिक ज्ञानाधारित शिक्षण घेतानाच हे विद्यार्थी रुग्णालयात सेवाही देत असतात. या विद्यार्थ्यांना काम करताना अनेक अडचणी येतात. या अडचणी जाणून घेऊन त्या सोडविण्यासाठी आरोग्य विद्यापीठामार्फत विद्यार्थी कल्याण विभागांतर्गत विशेष प्रशासकीय कक्षाची स्थापना करण्यात आली आहे.

…अशी असेल समितीची रचना

विद्यापीठाचे कुलसचिव या कक्षाचे अध्यक्ष आहेत. तसेच विद्यार्थ्यांच्या समस्यांवर उपाययोजना करण्यासाठी मुंबई, पुणे, नाशिक, नागपूर, अमरावती, नागपूर अशा सहा विभागनिहाय समित्या तयार करण्यात आल्या असून, प्रत्येक समितीमध्ये चार सदस्यांचा समावेश करण्यात आला आहे. कामासंदर्भात तसेच विद्यापीठाशी संबंधित अन्य कोणत्याही गोष्टीबाबत समस्या असल्यास पदव्युत्तर पदवी अभ्यासक्रमाच्या विद्यार्थ्यांना विद्यापीठामार्फत देण्यात आलेल्या ई-मेल आयडीवर निवेदन सादर करता येणार आहे. विद्यापीठ नियमानुसार दखल घेण्यास पात्र असलेल्या बाबींविषयी संबंधीत विभागीय समितीमार्फत पडताळणी केली जाणार आहे. या पडताळणीचा अहवाल समितीमार्फत विद्यापीठाला सादर केला जाणार असून, त्या अहवाानुसार विद्यापीठामार्फत पुढील कार्यवाही केली जाणार आहे. विद्यापीठामाच्या अधिकृत संकेतस्थळावर या समित्या, त्यातील सदस्यांची नावे व ई-मेल आयडी या गोष्टी जाहीर करण्यात आल्या आहेत.

व्हिजन डॉक्युमेंटनुसार अंमलबजावणी

विद्यापीठाच्या कुलगुरू डॉ. माधुरी कानिटकर (निवृत्त लेफ्टनंट जनरल) यांनी विद्यापीठाच्या कामात सुसूत्रता आणण्यासाठी एक व्हिजन डॉक्युमेंट तयार केले आहे. त्या व्हिजन डॉक्युमेंटचा भाग म्हणजे या समित्या आहेत. शैक्षणिक वर्ष २०२०-२०२१ मध्ये पदव्युत्तर पदवी अभ्यासक्रमाच्या विद्यार्थ्यांना कोव्हिड काळात सेवा द्यावी लागत होती. या विद्यार्थ्यांना स्पेशलायझेशनचे कोणतेच शिक्षण या काळात दिले जात नव्हते. त्यामुळे अनेक विद्यार्थ्यांमध्ये नाराजी होती. विद्यार्थ्यांचे स्टायपेंड, फी याबाबतही ‘मार्ड’मार्फत अनेकदा संपाचा इशारा दिला जात होता. या समस्यांवर तोडगा काढण्यासाठी या समित्या उपयुक्त ठरणार आहेत.

भारतीय विद्यार्थी शिकण्यासाठी युक्रेनमध्ये का जातात? जाणून घ्या

विभागनिहाय समित्यांमुळे त्या-त्या भागांतील विद्यार्थ्यांच्या समस्या सोडविण्याकडे अधिक चांगल्याप्रकारे लक्ष देता येणार आहे. अनेकदा विद्यार्थ्यांच्या समस्या विविध माध्यमातून विद्यापीठापर्यंत पोहचतात. परंतु या समित्यांमुळे या समस्या थेट विद्यापीठापर्यंत पोहचण्यास मदत होणार आहे. तसेच यावर तोडगाही काढता येणार आहे.

– डॉ. कालिदास चव्हाण, कुलसचिव , महाराष्ट्र आरोग्य विज्ञान विद्यापीठ

विद्यार्थ्यांना मोठा दिलासा! आयुर्वेद रुग्णालयात आता वर्षभर ‘इंटर्नशिप’

MUHS: महाराष्ट्र आरोग्य विद्यापीठात आता ‘ग्रीन कॅम्पस’