कसूरी मेथी बनवा घऱच्या घरी, सोपी पद्धत

मेथी व्यवस्थित धुवा

सर्वात पहिले बाजारातून आणलेली मेथी ३-४ वेळा स्वच्छ पाण्याने धुवा. मेथीच्या पानातील माती निघून जात नाही तोपर्यंत व्यवस्थित धुऊन घ्या. माती पूर्ण निघून गेल्यानंतर चाळणीत पसरवून ठेवा आणि पाणी निथळू द्या.

उघड्या भांड्यात ठेवा

मेथीची धुतलेली पाने तुम्ही झाकून ठेऊ नका तर त्यातील पाणी चाळणीतून निथळल्यावर एखाद्या उघड्या भांड्यात अथवा पातेलीत ठेवा. उरलेसुरलेले पाणीही सुकून जावे यासाठी थोडावेळ तशीच ठेवा. तुम्हाला हवं असल्यास, पंखा चालू करून त्याखाली सुकवूदेखील शकता. यामुळे पाने लवकर सुकतील.

(वाचा – दही आंबट झालंय तर फेकू नका, या पदार्थांमध्ये करा उपयोग आणि बनवा अधिक चविष्ट)

मेथी सुकवा

घराच्या बाल्कनीमध्ये कॉटनचा कपडा पसरवा आणि त्यावर मेथीची धुतलेली पाने वाळत घाला. दुपारी एकदा उन्हात ठेवा आणि रात्री हे मलमलच्या कापडात गुंडाळून तसंच ठेवा आणि दुसऱ्या दिवशी पुन्हा उन्हात ठेवा. जर ऊन येत नसेल तर साधारण ४-५ मिनिट्स मायक्रोवेव्हमध्ये ठेवा.

(वाचा – अण्णाच्या स्टॉलसारखा मऊ उपमा बनवायचा असेल तर वापरा सोप्या टिप्स, कधीच होणार नाही फडफडीत )

कसूरी मेथी कशी साठवाल?

२-३ वेळा उन्हात सुकवल्यावर कसूरी मेथी तयार होते. पानाचा रंग पूर्ण बदलतो. मेथीची पाने हातात घेतल्यावर कुस्करली जात असतील तर कसूरी मेथी तयार झाल्याचे समजावे. ही मेथी आता साठवण्यास तयार आहे. जेव्हा मेथी पूर्ण सुकते तेव्हा एका एअरटाईट कंटेनरमध्ये तुम्ही भरून ठेवा. याची चव आणि सुगंध बराच काळ टिकतो.

(वाचा – ​घरात दही लावल्यावर पाणी सुटतंय का? घट्ट आणि गोड दही बनविण्याच्या सोप्या ट्रिक्स)

कसूरी मेथीचा वापर कशात करावा?

• अनेक पंजाबी भाज्यांच्या ग्रेव्हीमध्ये कसूरी मेथीचा वापर करता येतो. तर बटाट्याच्या भाजीतदेखील तुम्ही याचा वापर करू शकता. जिरे, कांदा, टॉमेटोची फोडणी घालून तुम्ही त्यात बटाट्याचे तुकडे मिक्स करा आणि त्यावर कसूरी मेथी मिक्स करा. याची चव अप्रतिम लागते
• पराठ्यातदेखील तुम्ही कसूरी मेथी घातल्यास, स्वाद अधिक येतो. उरलेली बटाट्याची भाजी अथवा आमटी, बेसन पराठे करणार असाल तर त्यात कसूरी मेथी कुस्करून घाला. याचा स्वाद अधिक चांगला लागतो
• कढीची चव यामुळे वाढते. ताकाची कढी केल्यास, मेथीच्या दाण्याऐवजी तुम्ही कसूरी मेथीचाही वापर करू शकता. याशिवाय भजीमध्येही याचा वापर करता येतो

कसूरी मेथी घरी बनवणे अत्यंत सोपे आहे. तुम्हालाही बाजारातून आणायची नसेल आणि घरात जेवणाचा स्वाद वाढवायचा असेल तर तुम्ही ही सोपी पद्धत नक्कीच ट्राय करून पाहा!